Ki khubor rit, ki la khang lut, hynrei ka Google, ka kamai 4.7billion dollar na ki khubor

Washington: Ki kotkhubor rit bad kiba pdeng, ki la khang lut ha kine ki sngi bad wat ki kotkhubor heh ruh, ki la nang ia kynduh jingeh, hynrei ka Google marwei, ka kamai $4.7 billion na ka Search bad ka Google News ha u snem 2018 lane kaba long la kumba ki ioh kamai baroh ki kotkhubor ha America ha u snem ba ladep.
Kat kum ka khubor jong ka The New York Times, ki kotkhubor ki ioh kamai $5.1 billion na ki jingpynbna bad katei ka jingshisha, ka wan lyngba ka jingtip, kaba la ai da ka News Media Alliance, ha kaba don kumba 2, 000 tylli ki kotkhubor ha kylleng ka America.
U David Chavern, President bad Chief Executive jong katei ka kynhun, u kynthoh ba u nongthoh khubor, uba thoh ia ka khubor, u duhnong $4.7 billion. Kine ki shna pisa da katei ka rukom bad kumta ki dei ban siew kham bha sha ki nongthoh khubor”.

U Chavern, u ong ba kaba kongsan eh mynta, ka long ban pyntrei kam ia ka ain, kaba yn tip kum ka Journalism Competition and Preservation Act, kaba la leit rah da U David Cicilline na ka seng Democrats ha u snem 2018 bad katei kan ailad ia kito kiba pynmih khubor online, ba kin iakren ia pynbeit bad kito kiba thoh ia ki khubor ba ha kano ka rukom ki kwah ban pyndonkam.
Katei ka ain, ka ailad ia ki nongthoh khubor, ba kin iakren ia pynbeit na ka bynta saw snem kynthih, ha kano ka dur ba kin die lane kito kiba pynmih online ba kin pyndonkam bad ha kano ka rukom kin ia siew pisa.
La iathuh ba 40 percent na kito kiba klik ha kine ki sngi, ki kwah ban tip ia kaei ka khubor kaba jia man ka minit bad kaba ka Google, kam shym la pynmih satia nalade. Hynrei ka dei ka Google bad ka Facebook, kiba sam ia ki khubor haduh 80 percent bad ki dei lyngba kitei ki ar tylli ki thymmei, ba la pynpoi sha ki website bapher bapher.
Ka New York Magazine, ka thoh ba kawei na ki san tylli ki kotkhubor, ki la khang noh naduh u snem 2004 bad naduh u snem 2008 haduh u snem 2017, ka jingthung kam ha ki kotkhubor, ka hiar da 23 percent lane kaba long 27,000 tylli ki kam. Ka News Media Alliance, kan sei lut ia baroh ki jingshisha bad ki jinglap jongka, ha ka sngi Hat majai, ong ka khubor.