2 trok ki masi, iohbat ki dkhot ka RBYF bad FKJGP na ki thain Nongpoh

Nongpoh: Ki dkhot ka RBYF bad ka FKJGP, myn ha ka miet Sngi Thohdieng, ki la ioh ban bat ia ar-tylli ki trok kit masi na ki thain Nongpoh ha Ri Bhoi, ia kaba la suba jur ruh ba ia kitei ki masi la thmu ban shalan sha Bangladesh.
Kitei ki ar tylli ki trok kit masi, kiba la shah bat noh ia ki dkhot ka RBYF bad FKJGP, ki dei kiba don ia u number AS 01-BC-7588 bad AS-01-DC-8457, hadien ba la iohbat ia kitei ki trok kit masi, kitei ki dkhot sengbhalang, ki la pyntip noh ia ki nongialam ka Khasi Jaintia Butcher Welfare Association, ka kynhun ki nongot-doh masi bad kiba la sangeh shipor ka thied masi na Iew masi, hadien ba ki la kynnoh ba bun na ki masi la shalan sha Bangladesh.
Ka la long ruh kaba lyngngoh, ba hadien ba la iohkem ia kine ki ar tylli ki trok kit masi beain, hynrei haba kylli ia ki trai jong kine ki masi, kitei dribar bad nongbud jong kine ki trok ki la pynpaw pynban ba kim don jingtip ei ei halor ki trai jong kine ki masi, hynrei tangba ki la ju ioh ia ka jingbthah ban leit pynhap ia kine ki masi sha Khliehriat, Jaintia Hills.
Haba iadei bad katei ka jingiohkem kali kit masi, u Bah Generous Warlarpih, President, u la pynrem jur ia kane ka jingbym khein snep da ki riew shimkabu ia ka rai jong ka Association ban sangeh thied ne die doh masi hapoh ka jylla, ha kaba kane ka jingshalan beain sha Bangladesh la lap pynlein mynta ka miet bad kumjuh ruh u la pynrem halor ka jingshimkabu da ki katto katne ki nongshalan beain ia ki masi sha Bangladesh.
U la iathuh, ba katkum ka jinglap hadien ba la iohbat ia kitei ki ar tylli ki trok kit masi la lap ruh, ba ki nongshalan masi beaiñ ki la pyndonkam ruh da ki shalan ne ki kot ki sla ki bym dei satia kumba ki dei hok ban ioh lyngba ki doctor Veterinary bad na ka iew die masi na Khanapara.
Shuh shuh ruh, u Bah Warlarpih u la pynpaw, ba na ka liang ka Association hi kumba la rai ban sangeh thied masi na iew Khanapara bad ban sangeh die doh shipor hapoh ka jylla, kumta na ka liang ka Association Kan nym ailad ia kum kane bad kan sa wad bniah ia kito kiba donkti ha kane ka kam shalan beain ia ki masi.