Ka shnong kaba la rim bha ha Ri Bhoi, hynrei kaba dang sahdien ha kiba bun ki liang

Nongpoh: Ka la long shisha kaba sngewphylla ban tip ba ka shnong Nongrim Jirang, ka shnong kaba la rim bha ym tang ha ka thain Jirang, hynrei ha Ri Bhoi kumjuh, hynrei ka dang don hapdeng shibun ki jingeh kaba ki paidbah ki iakynduh bad kata ka long nalor ba kam ju kham ioh ia ki kam pynroi, hynrei kaba la pynsyllang eh ia ki paidbah ka dei ba mynta ka 10 snem kynthih ki hap ban shong dum khlem bording.
Haba ioh ban iakren bad ki katto katne ngut riew tymmen kiba sah ha katei ka shnong, ki la iathuh ba katei ka shnong ka dei kawei na ki shnong kaba la rim bha, hynrei tang namar ka jingshah iehnoh bein ha ka sorkar bad Nongmihkhmat, kaba la pynlong ia katei ka shnong ba kan sahdien bad duna ki briew kiba tip shaphang jong ka bad mynta ka la don tang kumba 70 tnum iing ei ei.
Ki la iathuh ruh, ba mynshwa katei ka shnong ka kham heh ha ki por ba mynshwa ban haba ianujor bad mynta, namar bun na ki briew kiba sah ha katei ka shnong ki la leit ban sah noh ha kiwei pat ki shnong, na ka bynta ban suk ha ka leit ka wan, ka buh skul khun, ki jaka sumar lem bad kiwei kiwei.
Haba batai pat halor ka jingeh kaba ki iakynduh haba sah ha katei ka shnong, kitei ki riew tymmen, ki la iathuh ba nalor ba ki la shem jingeh halor ka umbam umdih, hynrei kaba hakhmat eh ka dei halor ka jingbym don bording mynta la 10 snem tam.
“Dang ha kine ki khyndiat snem kum ka shnong, ka la lait na ki jingeh ha ka leit ka wan, namar ba la poi surok rong, hynrei kumba ka long ha ki por ba kham mynshwa ngi la mad ia shibun ki jingeh, khamtam eh haba iadei bad ka pang ka shitom, namar ka dei ka thain kaba la jngai ban pynpoi sha Patharkhmat lane Rani bari na ka bynta ban pynpoi ia ki nongpang sha ki jaka sumar” ong kitei ki riew tymmen.
Kiwei ki shnong kiba la mih hadien ka shnong jongngi, ki la tam shakhmat haba iadei bad ka roi ka par, hynrei kane ka shnong jongngi, ka sah hajuh shi shajuh, watla ka dei ka shnong kaba la slem bad rim hapoh ka thain, ki la bynrap.
Haba ioh ban iakren bad u Bah Stones Syiemphlang, Sordar jong katei ka shnong, u la kubur ia kaei kaba la iakren bad kitei ki riew tymmen bad uba la ong ruh ba ka jingdonkam kaba hakhmat eh kaba ki nongshong shnong ki donkam ka long ka Umbam Umdih bad ka Bording, kaba kum ki paidbah ki la shongdum mynta ka 10 snem tam.