Ithuh ka ECI ia ka NPP, kum ka National Party ha ri India

Shillong: Ka Election Commission of India (ECI) myn hynnin ka sngi, ka la ithuh ia ka National People Party (NPP) kum ka national party ym shuh kum ka regional party. Kane ka jingithuh ka ECI ka long hadien ba ka NPP ka la jop MLA ha ki katto katne ki jylla kiba don ha kane ka dong mihngi.
Kumba ka long mynta ka NPP, ka la don MLA ha Meghalaya, Manipur, Arunachal Pradesh bad Nagaland. Ka jingioh kyrdan National Party ka NPP ka dei hadien ba ka la jop san ngut ki MLA ha ka elekshon MLA ba dang shu dep shen ha jylla Arunachal Pradesh.
Da kane ka jingithuh ka ECI, kum ka national party, ka NPP kaba seng da u Purna A Sangma (bam kwai ha duwar u Blei) kan dei ruh ka party kaba nyngkong duh na kane ka dong mihngi ban ioh ia ka kyrdan kum ka National Party.
Halor kane ka jingithuh ka ECI, u Conrad K Sangma uba dei u National President ka NPP, u la ai khublei ia ki paidbah ka dong mihngi kiba la long ka daw ka jingithuh ia kane ka party ha ka rynsan sain pyrthei ka ri.
U National General Secretary ka NPP u Thomas A Sangma mynta ka sngi, u la aiti ruh ha u Conrad ia ka shithi ba la ithuh da ka ECI ia ka kyrdan national ia ka NPP.