U PHADAR FELIX MATTA U MISSIONARY BABHA

M.M.Thaiang
Hadien ba la pyniasoh jubor ia ka Thain Labang Nongphyllut, Elaka u Doloi Nongphyllut kawei na ki Elaka ka Rilum Jaintia ha ka snem 1951 da ka sorkar Assam ha ka jingai District ia ka Mikir Hills bad North Cachar Hills, kane ka thain ka la shah iehbein khlem kano kano ka kam pynroi ri, ka kam jingkoit jingkhiah bad khamtam ha ka liang ki Skul bad ha kaba kyntiew ia ka jingnang jingstad. Hapdeng ka jingshah iehnohbein ki don pat ki Nonglehbha bad ki Missionary kiba kyntiew ia ki briew jong ka thain ha ka liang ka jingplie ia ki skul rit bad kyntiew ia ka jngnang jingstad nalor ka kam pynphriang Khubor babha jong ki shaphang u Jisu Khrist. Ka long kaba dei ba yn buh jingthoh ban ym klet ia kiba ieid, kiba lehbha sbun ia ngi, kum u Phadar Elias Tome sdb, Phadar Joseph Arminana sdb bad u Most Rev. Archbishop Hubert D’ Rossario bad uwei na kine u long u Phadar Felix Matta sdb, uba la khlad ha ka 17 tarik Jylliew 1963, ha ka jingkylla jong ka Bur ( Khwan ong ki Pnar) ha ka Wah Myntang ha ka jingwanphai jong u na ka jingleit jngoh shnong ia ki para Khristan na shnong Thangrain sha Iing Parish ( Parish Raliang) ia kaba iatip mynta ka Parish Mookyndeng (Mawkyndeng). Na ka liang ki khun mynsiem jong u Phadar Felix Matta hapoh ka thain Labang-Nongphyllut ki don ka jingpynkhreh ban kynmaw ha kane ka 17 tarik Jylliew ia ka sngi khlad jong u.

Kum ban shu pynkynmaw ia u Phadar Felix Matta la kha ha ka 26 tarik November 1910 ha shnong Buttigliera d’ Asti, Itali( Italy). U la im 53 snem. 24 snem u la im ha iing lajong kum u nongrep brisohwain da kaba ai ia ka nuksa Khristan kum u Samla u babha. Haba pule na ka Biography jong u la ong ba ha kane ka rta, u la iohsngew ia ka sur kaba ong “ Khie leit sha ki jaitbynriew baroh ban ialap ia ka Khubor babha bad ia kiba ngeit da pynbaptist ia ki” bad ban lehbha ia ki briew katba lah ei. Kine ki kyntien ki la pynduh thiah ia u Felix Matta. Ban leit ialap ia ka Khubor babha sha ki Ri Mishon lane sha ki ri jong ka Pyrthei ym donlad lait satang ban long u Lyngdohniam Missionary.U Felix Matta uba don kane ka jingangnud, kum u Samla babha u la iohsngew ia ka jingpasiaw ban long u Lyngdohniam bad u la rung ha ka kynhun jingiasyllok Seng Salessian jong u Don Bosco. Saw snem kum u Aspirant hdien kum u Missionary ha Assam India.

U Phadar Felix Matta u la im 14 snem kum u Lyngdohniam ( Phadar). Naduh ka sngi ba la pynkyntang Lyngdohniam ia u, u la im tang na ka bynta ki Mynsiem ban ialam sha u Blei bad ban lehbha iala ki parabriew. Shuh shuh haba pule na ka kot lyngkdop “ A GOOD MISSIONARY” kaba thoh shaphang ka jingim u Phadar Matta, l shem ba kum u Missionary, u la ia kynduh shibun ki jingeh na ka bynta ka khubor babha, hynrei hapdeng bun ki jingeh u la ialeh borabor kum u Shipai bashlur jong u Jisu Khrist bad u la jop ia baroh.U Phadar Felix Matta u long uba riewblei, uba kmen barabor, u riew aitilut na ka bynta ka jingbha ia baroh bad u bym ju shongthait ban trei ia ka kam jingpynbna khubor Ktien Blei. U Phadar Matta u long u briew uba kloi ban len bad ban pynshitom ialade na ka bynta ka Khubor babha bad ban lehbha iala ki parabriew katba lahei. Ka mynsiem jong u kaba dap da ka jingieid ia u Blei bad u long u briew uba kloi ban len ialade na ka bynta ka jingbha jong kiwei. Shuh shuh ka kot lyngkdop “ A GOOD MISSIONARY” haba kren shaphang u Phadr Felix Matta ka ong “ DA SHISHA U LA LONG UBA LA KLOI BAN TYRWA IALADE HADUH KA JINGIAP HA KA WAH MYNTANG KUM KA JINGKNIA NA KA BYNTA KI MYNSIEM”.Shisnem shwa ka jingiap jong u, u Phadar Matta u la don ha Mawlai na ka bynta ka jingduwai Retreat bad kiwei pat ki Phadar. Ha ka 17 tarik u Jylliew 1962, u Phadar Matta u la pynlong marwei ia ka jingduwai lynti Diengphna. Ki jingthoh shaphang jong u la ong ba ha kata ka jingduwai lynti Diengphna, u la ioh sngew ia ka sur kaba najrong kaba pynbor ia u ban tyrwa lut ialade ha u Khrist kum ka jingknia na ka bynta ka jingkylla bamut ki Nongpop ban pynlait ia ki briew baroh na ki tyrsim jong u Ksuid u Khrei. Nangta la ong ba ha kaba nyngkong u la sheptieng. Hynrei lada kane ka long ka mon jong Me ko Trai “ u la ong ha khmih leh ia nga katba Me mon, k Maria ka Nongiarap ki Khristan kan sa iarap ia nga”. Naduh kata ka sngi ha kaba u la ong “ Ka Mon jong Me ko Trai kan long borabor na ka bynta jong nga”, u Phadar Matta u la bret lut ialade met bad mynsiem hapoh ka jingsumar sukher jong u Jisu bad ka Maria ka Nongiarap ki Khristan bad u la iaid haduh Kalbari na ka bynta ka jingkylla bamut ki Nongpop bad ban pynim ia ki briew baroh ban shuh shuh ka kot Lyngkdop “ A GOOD MISSIONARY”.Na ka bynta ka Khubor babha, ban iarap ia ki briew ban lait na ki tyrsim jong u Ksuid u Khrei, ka Shwar, ka Taro, ka Tyrud, ka Smer, ka Montor, ka Maia, ka Pamtim, ka Pamtiah, bad ban iarap ia ki briew ba kin bha kin miat ka longbriew manbriew, ki jingat phyllung jong ka Wah Myntang kim shym lah ban pynlip ia ka ia ka mynsiem jong u Phadar Felix Matta. U Phadr Matta u la khlad ha ka 17 tarik Jylliew 1963, ha ka jingkylla ka BUR ( Khwan) kaba u shong katba u dangjam ia ka jingatphyllung jong ka Wahmyntang.U Pope Ioannis XXIII, haba kren shaphang ka jingiap jong ki Missionary kiba la aiti iala ka jingim na ka bynta ka jingbha jong kiba bun kiba lang u ong “Wow ka jingitynnat ban iap hadien ba la im ka jingim baroh na ka bynta ka jingtrei Mission ha ki Ri Mishon”. Kine ki kyntien ki iahap bad ka jingim bad ka jingiap jong u Phadar Felix Matta, u Missionary babha.