| Shillong:Ki riew rangbah ka Hima Nongspung mynta ka sngi, haba ia kynduh bad ki nongpathai khubor, ki la dawa ia ka KHADC ba kin weng noh shwa shipor ia u Syiem ka Hima Nongspung katba ka jing tohkit ka dang iaid khlem da pynslem. Na ka liang ka hima nongspung ki la dawa ban weng ia u Syiem dei namar ba u Syiem ka Hima Nongspung u bah Patrik Syiemiong u lah len ia ka jing ai mynjur, ban shna surok ia ka sorkar assam. “Ha ka jing khot hajir u Syiem bad u bah Micheal ha ka KHADC ngi lah kren tyngeh ia ka jing ai NOC ban shna surok ia ka sorkar Assam hynrei baroh arngut ki khlem ai jubab eiei ia ka jingkren jong ngi” lah ong u bah Curtis Rani u ba dei u RTI activist bad u social activist. Na ka liang u Sordar barim bad u ba dei ruh u EC member jong ka Hima Nongspung u bah Noland Lyngdoh, u la ong ” u syiem ka Hima Nongspung u bah Patrik Syiemiong, u Philamon Kharmyndai joint secretary bad u bah Micheal Warjri ki lah donkti ban die tuh ia ka jaka sha ka KJP Synod Sepngi ha ka dor 2 lak 30 hajar haka ba ki lah pynpaw ia ngi ba ka dei ka jaka ba ai sngewbha ia ka balang”. Na ka liang ki paidbah ka Hima Nongspung ki dawa ia ka KHADC ban phah tohkit bniah bha ia ka jaka Hima Nongspung hi baroh kawei bad hakiwei ki thain Border Assam ioh dang bun kiei kiba don jingma ym tang ia ka hima hynrei ia ka jait bynriew hi. Ngi tip ba ka Assam ka ju kyntur pud man ka por hynrei mynta ngi hap kynnoh ia ki briew jong ngi hi kiba ju ai lad na ka por sha ka por ia ka Assam ba kan kyntur pud. |
Phi don ban ong eiei?