Thaw iarong ka sorkar ban buh pisa, ia ka MeCEL

Shillong, 2 Jymmang:
Ka sorkar jylla ka la thaw ia ka iarong ban buh pisa na ka bynta ki jingdon kam jong ka MeECL kynthup ia ki lai tylli ki tnad jongka kynthup ka transmission company, distribution bad ka distribution company) khnang ban siew ia ki jingdonkam kyrkieh haba donkam.
“Ka jingthaw ia ka iarong pisa ne ka corpus fund kan pynlong ia ka MeECL ban suk ban shim haba donkam khnang ba kan lah ban treikam ha ka rukom kaba iohnong”, la ong u Myntri Rangbah u Dr Mukul Sangma mynta ka sngi hadien ba la wai ka jingialang ka kynhun myntri. Katkum ka jingong jong u Myntri Rangbah u la ong ba ki la bthah ia ka tnad bording ka jylla ban buh ia kane ka iarong pisa ban pyndonkam ha kaba pyniaid ia ki kam jong ka MeCEL ban long kaba iohnong.
“Kine ki lai tylli ki tnad kiba hap hapoh ka MeCEL ki dei ban nang ban ieng ha la ki jong ki kjat”, u la ong.
U Sangma u la kyntu ia ka MeECL ban pynthikna ba kim dei ban shu ap bording nabar hynrei ki dei ban thaw ia ki lad ki lynti ban pynduna ka jingthied bording nabar.
“Ka jingpynbiang ia ka jingkhein jingdiah kan pynlong ia ka MeCEL ban ioh jingmyntoi na Financial Restructuring Plan jong ka sorkar India namar ba ka jingslem ban ioh ia ka jingkhein jingdiah ka la pynduh nong ban ioh ia ki jingiarap na ka sorkar pdeng”, u la ong. Nalor ka jingpynmih bording na ka um bad dewiong, ka sorkar ka la bthah ruh ia ka MeCEL ban thaw ia ki lad ki lynti ban pynmih bording na kiwei ki lad kum na ka sboh, bad ka sngi bad kiwei ki bor ba lah ban ai bording.
Kane kan pynduna ia ka jingshim bording nabar bad kan pynsuk ia ka MecEL, u la ong.