Ka MPSCB na kti ka PHE sha ka tnad Forest

Shillong, 2 Jymmang:
Ka sorkar ha kane ka sngi Thohdieng

ka la pynlait noh ia ka Meghala ya State Pollution Control Board (MPSCB) na ka jingpeit ka Public Health Engineering (PHE) bad la aiti sha ka tnad Forest and Environment department.
“Ngi la pdiang ia ka jingpynlait noh ia ka MPSCB na ka PHE bad la aiti sha ka tnad Forest bad Environment”, la ong u Myntri Rangbah u Mukul Sangma hadien ba la wai ka jingialang ka kynhun myntri.
Katkum ka jingong u Myntri Rangbah, kane ka jingleh ban kynriah ia ka MPSCB sha ka tnad Forest ka la don ha ka jingpyrkhat ka sorkar la kham slem.
Ha kajuh ka por, u myntri ka tnad Forest and Environment Bah Prestone Tynsong u la ong ba ka MPSCB ka hap hapoh ka jingpeit ka PHE naduh u snem 1983.
“Ngi la rai namar ba ka sorkar ka sngew ba ka kamram jong ka Board ka long ban peit ia ki kam ba iadei bad ka mariang. Bun ki ain ba la pyntreikam da ka MPSCB ki iahap bad iadei bad ki mat jong ka Forest and Environment”, la ong u Bah Tynsong.
Ia ka kam chairman la khlieh da u ophisar ha ka kyrdan Additional Chief Engineer katba u Executive Engineer u dei u member secretary.
‘Hynrei mynta ka Board kan khlieh da u Chief Conservator of Forest (CCF)”, la ong u myntri khlaw.