|
Shillong: U Secretary, Health and Family Welfare mynta ka sngi u la plie pyrda ia ka AYUSH Medical Health Camp and Herbal Garden, ka bym donkam siew pisa, ha phyllaw ka Civil Hospital, Shillong.
Ia kane ka programme la pyniad da ka ophis jong ka District Medical and Health Officer, East Khasi Hills.
U Pravin Bakshi, uba long u Secretary jong ka tnad Health and Family Welfare, bad ha ka juh ka por u Director jong ka AYUSH, ha ka jing plie ia ka ne ka lympung kum u kongsan u la ong ba ka jing pynkoit lyngba ki dawai kynbat ha ka rukom jingtip bad jingnang tynrai kala long shisha ka lad ka ba kongsan ha ka ban sumar ia ki jait jingpang ba laiphew jait ki ba ki briew khamtam sha ki thain nongkyndong ki ju ioh.
“Ka jingsumar tynrai kaba ki briew ki ju pyndonkam da ki dawai kynbat naduh hynthai kulong kuma ka dei ka bynta ka ba kongsan ha ka ban sumaria ki laiphew jait ki jingpang, kumta dei ban pynneh pynsah ia ka ne ka rukom sumar,” la ong u Pravin Bakshi.
U kongsan ha kane ka sngi u la ban jur ruh ba donkam ban buh jingthoh ia kine ki rukom ai jingsumar da kaba ong, “Kane ka rukom sumar tynrai ka long kaba donkam ban buh jingthoh lane record na ka bynta ka lawei khnang ba kan ym duh noh tang shiteng por,” bad u la kyntu ruh ba dei ban ri kyndong ia kane ka rukom sumar ka ba long ka jingstad bad jing shemphang jong u long shuwa ka ban bteng pateng la pateng bad ha kajuh ka por kyntiew bad phriang ia ka jing myntoi na ka jingsumar dawai kynbat bad kumjuh ruh ban ri pynneh ia ki kynbat dawai ba bun jait bad kiba kyrhai ha ka Jylla.
|
Phi don ban ong eiei?