“Kumno me lah hap na bneng, ko Lurshai!?”

AIS Suja

“Kumno me lah hap na bneng ko Lushai!? Ka dei ka jingkylli bad kyndit ba kumno u Lurshai u hap na bneng, kam mut ia uno uno u khlur (Star) hynrei ka thew ia u Lucifer u Angel ka Bneng, uba shisien ka por u la don ryngkat bad u Blei ha Bneng, ka Bneng kaba Lai ka jaka shong u Blei. Isaiah 14:12.
U Lucifer shisien ka sngi u la long u nongtem nongput ka Bneng ha ki sur kiba bang, ki jainkup jainphong jong u kiba remdor ba u Blei u la ai da ki maw kordor kum u Sardios, u Topas, u Diamond, u Beril, u Oniks, u Jasper, u Sapphire, u Emerald, u Karbonkl, ka ksiar, kine baroh long ki jainkup u Lucifer mynba u dang don ha bneng ryngkat bad u Blei. Esekial 28:13.
U Lucifer u la long u Kherub ba la sleh, u angel Rangbah ba don thapniang (Wings) ba itynnad shibun, u la long uba janai tad haduh ka sngi ba u Blei u la shem ia ka jingbymhok jong u. Kaei ka jingbymhok ha u Lucifer? Ka dei ka Jingsarong. Ka jingsarong jong u ka paw da ki kam jong u, u ong – “Nga long u blei, nga shong ha ka jingshong u Blei” Esekial 28:12 / Esekial 28:14.
Ong u Blei – “Ka dohnud jong me ka la meng, namar ka jingitynnad jong me (u bha dur eh), ‘Me la pynsniew ia ka jingstad na ka daw ka jingphyrnai jong me” Esekial 28:17. Dei namar kata nga la bret ia me kum uba sang na u lum u Blei, bad nga la pynjot ia me ko Kherub” Esekial 28:16.Ka jingsarong u Lucifer ka la pynjot ia u hi, da kaba u ong ha la ka dohnud – Ngan kiew sha bneng, ngan kyntiew ia la ka khet haneng ki khlur u Blei (kham halor ia kiwei) … ngan kiew sha lyndet ki lyoh ngan long kum uba hajrong tam (Most high)” Isaiah 14:13-14.
Dei ka pop ka jingsarongh ba la beh noh ia u Lucifer na ka Bneng kaba Lai sha ka bneng kaba Ar. Kane ka bneng kaba ar ka long kaba thylli (Vacuum) kaba long ka haw haw ba dum tliw tliw.
Ka bneng ba ar ka long ka jaka shong ba shipor jong u Lucifer bad ki angel jong u ba la khot ki jaka bneng ia kane ka bneng ba ar, u Blei um kwah ong ei ei, um ong ba ka long kaba bha, namar haba u Blei u la beh noh ia u Lucifer na ka Bneng bashong u Blei (bneng ba lai), u Lucifer u la kylla noh u ksuid u soitan. Te haduh mynta u Lucifer soitan u don hangtei ha jaka bneng ba ar, poh khrum u Blei tad ynda yn poi ka por ban shop noh ia u soitan (Lucifer) na ka jaka bneng sha khyndew. Jingpynpaw 12:7-9
Ha ka Kitab u Isaiah la thoh – “Pynban yn sa pynhiar ia me sha dujok” Isaiah 14:15. Kumta, ka por ka la jan shwa ba u soitan uba ju long u Lucifer un ioh ban synshar ia kane ka pyrthei, kata tang shu la pynieng ia ka Temple ba Lai ha Jerusalem, ba ha shuwa kaba kut ki 3 snem shiteng kaba nyngkong jong ki 7 snem ne jong ka Shi Taiew Bakhadduh ba la ong da u Daniel 9:27. Kan long ka por ban pynhap noh ia u soitan (Lucifer) na katei ka jaka shong jong u mynta, ka bneng ba Ar sha khyndew. Jingpynpaw 12:7-9, ka por jingpynhap ia u soitan na ka bneng ba Ar sha khyndew, kan long ka por ba shyrkhei, bad un ioh ban synshar shi por ia kane ka pyrthei na kata ka Temple ba Lai na Jerusalem.
Ban pynhap ia u soitan na kata ka bneng ba Ar donkam da ka thma. “Bad ka thma ka la long ha bneng: u Mikhal bad ki angel jong u ki la ialeh thma ia uta u Iakjakor (soitan) uta u Iakjakor ruh bad ki angel jong u ki la ialeh thma pyrshah ia u Mikhal u angel (U Blei). Hynrei kim shym la jop (la rem u Iakjakor) bad ia ka jaka shong u Iakjakor soitan ym shem shuh ha kata ka bneng ba Ar” Jingpynpaw 12:7-8.
La shop ia uta u Iakjakor bakhraw u bsein tymmen u ksuid bad u soitan, bad u la leit shukor ia ka pyrthei baroh kawei ……. kordit ia kata ka khyndew namar u ksuid u la leit hiar ha phi U DON KA JINGBITAR BAKHRAW, NABA U TIP BA U DON SA TANG KHYNDIAT KA POR” Jingpynpaw 12:7-12.
U soitan un rung ha uta u Briew ka pop, un synshar dusmon ia kane ka pyrthei ha kita ki 3 snem shiteng kaba Ar bad hapoh kita ki por ki jingpyndait (4, 5, 6, 7 Seals) Jingpynpaw 6:12-17 / Jingpynpaw 8:7. Hadien kine kiei kiei yn kem bad set byndi ia u soitan (Lucifer) 1000 snem. Jingpynpaw 20:1-3.
Ha ka por ba ialeh thma ha bneng la jop ia u bad la pynhap ia u sha khyndew. Jingpynpaw 12:7-9. Ha ka por ba la shop ia u, u Jisu u ong – “Nga la iohi ia u soitan ba u hap kum ka leilieh na bneng” Loukas 10:18. Kumta, hadien ka jingsynshar shipor jong u soitan ia kane ka pyrthei, yn kem ia u bad set byndi ia u. Jingpynpaw 20:1-3. Ka daw ka long ba un ym ioh shukor ia ka pyrthei hapoh kita ki 1000 snem ka jingsynshar u Jisu Khrist hangne ha pyrthei. Bad hadien ki 1000 snem, yn pyllait kai ia u shipor na ka byndi jong u ba un don bynta ha ka thma khadduh, ka thma Armageddon hapdeng u Gog bad u Magog. Te ka ding kan hiar na u Blei bad bam duh ia ki. Te ia u soitan la kem bad bret sha ka pung ka ding bad u kyndok ha kaba don lang u Mrad khlaw, u nongiathuhlypa lamler (bad kiwei) te yn pynkordit ia ki mynsngi – sha ki bymjukut bymjukut” Jingpynpaw 20:7-10.
Ka mut, mynta u soitan bad ki ksuid kim pat don ha dujok lane ha pyrthei. U soitan u dang don hangtei ha ki jaka bneng (heavenly realm) ba la khot ka bneng ba Ar, ka ha haw ba dum tliw tliw. Dei tad hadien kine kiei kiei baroh ba yn sa bret ia u ha kata ka pung ka ding bad ksuid bad briew kiba long ki nongbud jong u. Ka ktien u Blei ka iathuh ia kata.U soitan mynta u shu iaid kai sha pyrthei lem bad ki shakri jong u ki ksuid katba kam pat dei ka pali jong u ban synshar ia ka pyrthei, hynrei ka por ka la jan eh ia u ksuid u soitan namar lah slem bah u kwah long syiem. U Blei un ai ia u tang 3 snem shiteng. Daniel 9:27.
Kumta na ka jingsarong jong u un poi syndon sha ka pung ka ding. Te jar uba ym shym la shem ba la thoh ia ka kyrteng jong u ha kata ka Kitab ka Jingim, yn bret sha kata ka pung ka ding. Jingpynpaw 20:15. Kiba kyreit ba ai ksuid, kiba pyniap ba mane bleithaw kiba ieit bad thaw ia ka lamler – yn bret sha ka pung ka ding. Jingpynpaw 22:15.