|
Shillong: Ka jingpynslem jong ka Sorkar Jylla ban pynïeng ïa khyrdop talasi mynder ka la pynlong ïa ki seng bhalang ka jylla, ka Khasi Students’ Union, Federation of Khasi Jaiñtia and Garo People, ka Ri Bhoi Youth Federation (RBYF) bad ka Hynñiewwtrep National Youth Front ban hiar jurip mynta ka sngi ka 29 tarik u Jymmang, ïa ka jaka ha Umling, Ri-Bhoi District, kaba ka jingtrei ka la sdang hynrei la kynnoh ba ka long kaba suki palat.
 Ka Entry/Exit Point la ong kan tehlakam ïa ka jingwanrung kyrthep jong ki bar jylla, bad kat haduh mynta hi, ka sorkar lyngba ka tnad PWD ka dang sdang ban pyntrei ïa ka Entry Point hapoh shnong Umling, ïa kaba la long trai nongkynti da ka tnat Transport jong ka sorkar Jylla.
U President ka KSU u Bah Lambokstarwell Marngar haba kren sha ki nongpathai khubor hadien ka jingjurip ïa kane ka jaka u la pynpaw ka jingbynnïaw halor ka jingsuki shaba palat jong ka jingtreikam.
“Ka sorkar ka dei ban leit sha ka basic ha kaba iadei bad ka Entry-Exit Point katkum ka jingiakut bad ngi ki sengbhalang,” la ong u samla Lambokstar bad u la pynshai ba ki mat ki long ba ki don kiwei kiwei pat ki bynta ba ka sorkar kadei ban, “categorize ïa ki visitors, lada ki dei ki labour, ki tourist ne kiwei kumta ter ter.”
U Bah Lambokstarwell Marngar u la ong ruh ba ka jing ïakut ka long ba ki kali jong ki shipai ne Central Force kim donkam ban ïaid lyngba ki Entry/Exit Point.
“Hynrei kaba eh mynta ka long ba hangne la pynïeng ïa ka Entry Point bad ym ïohi dak eiei halor ka Exit Point. Ka mut ngi hap ban ïakynduh biang bad ka sorkar ban ïashai ïa ka jingsdang hangne la ka la ka lah mang ne em ban buh ïa kita ki Entry/Exit counters, ngi hap ban sngewthuh shai,” la buh jingkylli u President ka KSU.
Kiwei ki mat kiba une u nongïalam ka KSU u la kdew ka long halor ka Pass lane Permit ba ka sorkar kadei ban issue na kane ka jaka katkum ka category jongki nongwan rung.
Ha kajuh ka por, na ka liang ka KSU ka la byrngem ba kan ym shongthait satia halor kane ka mat kaba ktah ïa ka lawei jong ka jaitbynriew.
U President ka seng FKJGP u bah Welbirth Rani u la ong, “Ka long kaba sngewsih ba kane ka kam ka long kaba suki than eh khamtam ba ka dei ka kam iap kam im jong ka jaitbynriew haba ngi wan ban ïuhkjat bad ïohi kumne.”
U Samla Welberth u la kynnoh ruh ba ka sorkar ka kloi stet ban shna ïa ki weight bridge hynrei haba shna ïa ka khyrdop talasi mynder kaba dei ka “core issue” ka kam ka suki palat.
Kumta u la ong ba ka seng kan ym shongthait ym tang ba kane ka phang kan kut hangne.
“Haba ïakren shaphang ka Comprehensive Mechanism ba kynthup ïa ka khyrdop (Entry/Exit Point) bad ka Meghalaya Safety and Security Act 2016, ngi la pynsngew ïa ka sorkar ban pyntreikm ïa ka NRC hapoh ka jylla jong ngi, ban pynshong nongrim ïa u snem 1971 kum u snem ot kyrteng, ki mat kiba ngi shim khia tad haduh ba ki aiñ ki kanun kiba ngi la tyrwa sha ka sorkar kin longdoh long snam shisha,” la ong u bah Welberth Rani.
U General Secretary ka HNYF u Bah Sadon Blah u la ong, “Ngim hun ïa ka rukom pyntrei namar naduh u snem 2014 ruh haduh 2016 ka kam ka la shu sah teng, mynta haduh 2019 la sdang ban tih kumta ka sorkar kadei ban pynstet. Kane ka dei ka Entry Point ka dei ban pyndep ruh ïa ka. Ki dei ban long ha kajuh ka por. Ngi sheptieng ba kane ka lah ban long tang ka ‘eye wash,’ ba lada ngim long kiba la khreh ban ïada ialade, ngin sa jot.”
|
Phi don ban ong eiei?