|
Shillong: Ka Khasi Jaintia Presbyterian Girls’ Higher Secondary School, Shillong ka la ioh jingiarap na bynta ka koit ka khiah ki khynnah pule lyngba ka kor um dih ba la shna da ka Rotary Club Shillong.
Ka Rotary Club Shillong ka la noh synñiang da kane ka kor um sha ka skul KJP HSS ha ka jingialang ba la pynlong ha phyllaw skul ha kaba la iadon long u Lat ka Jylla U Tathagata Roy kum u kongsan.
  Haba kren shaphang ka umdih, u lat Tathagata u la kdew shaphang ka jinglong kyrpang jong ka da kaba kdew ia kawei ka poitri ba kyrteng, ‘the rhyme of the ancient mariner’ kaba la pynkynmaw ia u ba ka umdih ka long kaba kongsan.
“Ka jingkyrduh um ka pynkthang ia ka mynsiem jong nga, bad haba nga iohi ka jingpahuh um ka pyndap ia ka mynsiem jong nga da ka jingkmen,” la ong u lat Tathagata katba ha kajuh ka por u la ai ka jingsngewnguh sha ka seng Rotary Club of Shillong kaba la shim ia ka sienjam ba noh synñiang sha kane ka skul da ka kor um.
U Lat ka jylla u la ai ruh ki kyntien sneng kyntien kraw sha ki khynnah pule jong kane ka skul da kaba kyntu ia ki ba kin ym long kiba pynsepei ia ka umdih.
Ha kajuh ka por u Lat Tathagata u la ong, “Kampher la ngi long ki paid riewlum ne ki paid ri thor, kam pher la ngi ngeit ha kano kano ka niam ruh, Khristan, Hindu lane Musulman, ngi dei ban long ka nuksa ha ka jingim, kum ki nongshong shnong jong ka ri India hi salonsar.”
Kiwei ki kynrem ki lyndan kiba la ia don lang ha kane ka sngi ki kynthup ia u MLA ka North Shilllong Constiteuncy, u Bah Adelbert Nongrum, u President ka Rotary Club of Shilong u Kailash Verma bad ki dkhot, kynthup ruh ia u Rangbah Shnong ka dong Mission Compound u Bah Geffrey S Basan, ka Principal ka skul ka Kong Havila Mondalyne Marwein, ki nonghikai bad ki khynnah skul.
|
Phi don ban ong eiei?