|
Shillong: Hadien ka jingmih khubor ba ka seng ki samla pule Khasi Student’s Union (KSU) ka la kynnoh ba la don ka jingthmu ban die lilam ia ka jaka kaba heh 1000 hectare sha ka tnad shipai khappud Border Security Force (BSF), mynta ka nohphaisngi, u Syiem ka Hima Mylliem u Pa’iem Ainam Manik Syiem u la lum ia ki lad parhai khubor ha ophis treikam jongu ban pynshai.
 U Syiem ka Hima Mylliem ula kubur ba ka don shisha kata ka jingthmu ban die ia ka jaka jong u briew shimet, namar ba la don ba wan pan jingbit na ka ophis jongu ryngkat bad ki kot ki sla kum ka No Objection Certificate (NOC) na ki shnong ki thaw ba marjan.
Hynrei, ha kajuh ka por u Pa’iem Ainam Manik u la kyntait war pat ia ka jing kynnoh ba ka Hima Mylliem bad ka Raid Marwet ki ia don bynta eiei bad kane.
“Ka lah don ka jingkyrpad na u trai jaka namar u la ioh ia ka NOC na ki shnong kiba marjan ban die ia ka jaka sha ki BSF,” la kubur u Syiem Mylliem haba pynshai sha ki nongpathai khubor ka nongbah.
Hynrei u Syiem u la ban jur ba ka Hima kam pat shym la mynjur satia wat hadien ba la ioh ka jingthoh na ka ophis u Syiem Raid Marwet.
U Pa’iem u la ong, “Na ka liang jong ngi ngi lah ioh ka shithi na u Syiem Raid Marwet bad ruh na u trai jaka uba dei na ka jait kur Law, ban pan approval na ngi hynrei ngim shym la mynjur pynban ngi la shong da ka Executive Committee bad rai ban pan approval na ka District Council.”
Halor kane, na ka liang jong ka ophis u Syiem Mylliem ka dang ap ia ka jubab lane ka jingmynjur na ka KHADC kumta u Syiem Mylliem ula pynpaw ka jingsngewsih ba la mih kum kane ka jingkynnoh.
“Ka long kaei kaei kaba phylla ban shu shah kynnoh kum iangi ki khlieh nongsynshar bad ia ka Dorbar hi baroh kawei ban ong ba ka don kum kata ka jingdie lilam te ka long kaba sngewsih namar ba ka Hima Mylliem haduh mynta kam don jaka ei ei, ” la ong u Pa’iem Ainam da kaba pynshai ba ki jaka puta baroh ki dei ki jong ka raid bad jong ki briew shimet, ym jong ka Hima.”
|
Phi don ban ong eiei?