Pynkut ka Seng Khasi Khynnah ia ka jingdap 25 snem

Shillong: Ka Seng Khynnah Seng Khasi Kmie Mawkhar, ha ka sngi Robibar ka 26 tarik Jymmang 2019, ka la pynkut ia ka jingrakhe ia ka Jubili Ksiar ba la long ha Seng Khasi Higher Secondary School Hall, Jaiaw.

U Kongsan ba la wan ban ïa don lang ha kane ka sngi u long u MLA jong ka Mawphlang Constituency u Rgh S.K Sunn bad ba u symbud kongsan dei u waheh Puramon Kynjing Dolloi ka Elaka Jowai bad ba dei u President Lympung Ki Khynnah Seng Khasi bad Seiñ Raij.
Haba kren kum u kongsan na ka liang u bah S.K Sun, u la ban jur ïa ki kmie ki kpa ba ka por kadei ïa ki ba da lei lei ym bit ban pynpep skul ïa la ki jong ki khun, namar ka jingstad ka long kaba donkam bha ha kum kane ka juk kaba mynta, kaba ki khun ki kti bad ki pateng kiban wan kin lah ban tip bad shemphang kham bha shuh shuh ïa la ka jong ka niam ka rukom bad ka riti ka dustur.
Nalorkata u bah S.K Sun u la pynpaw ruh ïalade bau wan na ka longïing kaba kit bad bah bha ïa ki kam kiba dei bad ki jong ka Seng Khasi, ha kaba u juh kloi ban ïarap ba un noh ïa la u synñiang u bynhei sha man la ki tnat Seng Khasi haba ki donkam ha ka por ba ki pynlong ïa ki Shad Suk Mynsiem ha ki shnong ki thaw ki jong ki.
Nalor kata u la ainam bad ai burom ïa ki nongseng ïa ka Seng Khynnah kum ïa I kong Litidora Lyngdoh Nongpiur, ba dei I nongseng ïa ka Seng Khynnah, nangta ïa u Rgh Bhiren Sing Thangkhiew kiba la bam kwai ha dwar u Blei bad nangta ïa u Rgh Spiton Kharakor, uba la bteng ïa ka lyngkha ba la dep ban prat da ki nongseng kiba ha shwa jong u naka bynta ban lum ban lang ïa ki khynnah naduh ba ki dang rit ba kin tip bad sngewthuh kham jylliew ïa ka niam tynrai.
Naka liang u bah S.K Sun, u kitbok ka kit rwiang bad kyrmen ba ka shalyntem jong ka jingtreikam ka Seng Khynnah ka Seng Khasi Kmie, Shillong kan ïai bteng na kawei ka snem sha kawei pat.
Haba phai sha ka prokram, ka la don ka jingpynkup burom ïa ki shotshan ka Seng Khynnah Seng Khasi Kmie kum ïa Kong Sweetymon Rynjah, Kong Litodora Lyngdoh Nongpiur, Rgh Bhiren Sing Thangkhiew bad kumjuh ïa u Rgh Spiton Kharakor.
La pynphuh pynphieng ïa ka jingïalang da ki jingrwai, ki drama lyngkot, ki jingshad ba la ai da ki hep barit ki tnat Seng Khynnah ka Seng Khasi bad Seiñ Raij bad ba la bynrap da ka jingsam ïa ki khusnam sha ki khynnah kiba la jop ha ki jingïakob ba la pynlong kum shi bynta ka jingrakhe ïa kane ka lyngkhuh snem kaba 50.
Nalor katta la ioh ruh ïa ka jingkren pdiang sngewbha na u Rgh D.K Dkhar bad jingkren ai khublei na u Rgh P.D Nongrum ba dei President bad General Secretary Seng Khasi Kmie, Shillong bad ka jingpule ïa ka kaiphod lyngkot da I kong Ibabet Hynñiewta, Secretary Seng Khynnah Seng Khasi Kmie.