Lah ka surok suin ban ia ka lynti suin ban weng sahkut kali: SK Sun

Shillong: U MLA ka Mawphlang u bah SK Sunn u la pynher shithi sha u Myntri Rangbah ka jyllla u Conrad K Sangma myn hynnin ka sngi, ban kyntu ba ka sorkar ka dei ban pynleit jingmut beit kham bha ban shna da ka surok suin (flyover) ban ia ka lynti iaid kjat na suin ne sky walk khnang ban pynduna ia ka jingkhapngiah ne sahkut kali ha ka surok ha nongbah Shillong.
Ha ka shithi sha u myntri rangbah ka jylla, u bah SK Sunn u la ong, “Ngi la mad ia ka jingsahkut kali haba ngi leit sha Guwahati ynda la poi ha lad Ganeshguri Temple hynrei hadien ba la dep ia ka surok suin, ka jingsahkut kali ka la duna war ha katei ka jaka. Halor kane, nga sngew ba ka jingshna da ka surok suin kan kham biang ban weng ia ka jingsahkut kali ha ka nongbah”.
U la ong ba kan long kaba bha ia ka sorkar ba kan aiti ha ki kompeni kum ka ADB ne JICA ba kin pynkhreh ia ka dur ka dar ne ka DPR, na bynta kane ka jingthmu bad ban aiti pat ha ka PWD ba kan pyntrei ia ki kam.
“Ka rukom pyniaid kali ha sor, ka long kaba tang shipor bad kaba bun ki jingdkoh bad ngam ngeit ba ka jingkieng iaid kjat na suin ha Barik kan weng ia ka jingsahkut kali ha 3Mer shiteng, ha Anjalee Petrol Pump, ha Rilbong bad ha kiwei ki jaka”, la ong u bah Sunn.
U MLA ka Mawphlang u la ong ba naduh ba la dep ban shna ia ka surok ar liang ne two lane na 7Mer sha Nongstoin, la khylluid ka jingiaid kali hynrei haba rung sha sor Shillong, ka jingsahkut kali ka la jubor bha.
“Nga sah ha Mawngap, nga iaid da ka kali 15 minit haduh 3Mer Shiteng kaba jngai 20km hynrei na 3Mer Shiteng sha sor Shillong kaba kham jan, ka shim por haduh 1 kynta ne tam namar ka jingsahkut kali bad kum kane ka jia ruh ha man ki lad ha Shillong’, la ong u bah Sunn ha ka shithi sha u Conrad.
U MLA ka Mawphlang u la ong ba u la dep rah ruh ia kane ka mat hapoh ka iing dorbar ban weng ia ka jingsahkut kali bad ka dei ruh kaba ju iakren bha man ka por hynrei ka jingeh ka la nangjur katba nang mih ki sngi.