Pyndonkam pisa bakla ka VEC Kyndong Wahlang, ong ka Seng Samla

Shillong, 1 Jymmang:
Ka Village Employment Council (VEC) ka shnong Kyndong Wahlang kaba don hajan Sohiong, East Khasi Hills ka la shah kynnoh ba la pyndonkam bakla ia ka pisa na ka skhim Mahatma Gandhi National Rural Employment Guarantee Scheme (MGNREGS).
Ka Seng Samla Maw kneng kaba pan jingtip da ka RTI halor ka jingpyntreikam ia kane ka skhim ha katei ka shnong, ka la lap ba kane ka VEC ka la pyndonkam bakla ia ka pisa haduh T.2 lak kaba la thmu ban shna ia ka surok shnong na kane ka skhim.
U president ka SSM u Bah C Rani u la ong ba katkum ka jingtip ba la ioh na ka RTI, lashem ba na ka T. 9.53 lak ba la mang ban shan ia ka surok shnong kaba jrong 100 meter, la mang T. 5.50 lak na ka bynta ban siew bai bylla bad T.3.3 lak ban thied tiar.
“Hadien ba ka eksamin ia ki kot ki sla, ngi suba jur ba ka la don ka jingpyndonkam bakla ia ka pisa kaba la mang na ka bynta ban shna ia kane ka surok da ki nongkitkam ka VEC”, la kynnoh u Bah Rani.
U laong ba ka Seng Samla ka la thoh sha ka VEC la lai sien ban ai ka jingpynshai katkum ba la lap da ka RTI hynrei kim shym la ai satia.
U president ka SSM u la ong ba u Block Development Officer (BDO) ka Mawphlang Community and Rural Development Block u la pynlong ia ka jingtohkit ha u Nohprah mynshem snem.
“Hynrei kaba sngew lyngngoh, ka long ba u BDO u la kyntait ban ai ia ka kopi ia ka kaiphod jong ka jingtohkit haba la kyrpad ruh. Khadduh ngi ioh ia ka kaiphod ka jingtohkit da kaba pan RTI kaba la pynpaw ba la pyndonkam bakla T. 1.58 lak”, la ong u Bah Rani.
Ha kajuh ka por, u la ong ba um shym la hun ia ka kaiphod ka jingtohkit namar ba ia ka pisa la pyndonkam bakla haduh palat T.2 lak.
“Ngi la rai ban ujor da ka FIR pyrshah ia u chairman ka VEC u bah Dran Kharphuli bad u secretary u Bah Disnor War kiba pyndonkam bakla ia kane

ka skhim”, la ong u president ka SSM hynrei kaba lyngngoh ka long ba ki pulit kim shym la leh eiei halor ka FIR.
U la ong ba la kyrpad ruh ia ka VEC ban ai ia ki job card bad pass book jong ki nongioh bynta.
“Hadien ba la pule bniah ia ki kot ki sla, la shem ba ka pisa ba la buh ha bank ka duna haba ianujor ia ka pisa ba la kdew ha ka job card.
Kane ka pyni ba ka VEC ka la pyndonkam bakla ia ka pisa” u la ong. Namar ka jingbym leh eiei ia ka FIR, ki dkhot jong ka shnong ki la pynlong ia ka jingiasoi paidbah ban ujor sha ka sorkar ban leh mardor ban pynshitom ia kiba donkti ban pyndonkam bakla ia ka pisa.