Don ka jingshah khniot iap ka khynnah rit ha surok Mawngap?

Shillong,1 Jymmang:
Ka mih bha, ka jingiakren ha kine ki sngi, ha kiba leit ba wan, ha kiba shong taksi, ba ka la don ka jingjia shah pyniap ha ki thain Mawngap, ha kaba iwei i heprit i bym pat shym la ioh kyrteng haduh mynta i la shah khniot iap, katba u kpa jong i, u la laitim bad u don hapdeng ka jingmynsaw jur, bad la ioh jingtip ba utei u rangbah u bym pat tip kyrteng haduh mynta u don hapdeng ka jingsu mar-namar ba u la shitom jur. Ka don ka jing iathuh ba katei ka jingjia ka la jia ha Wahumpatiah shuwa ban poi sha Kreit bad Mawreng, ka jaka sha ki thain Mawngap. La iathuh ba u kpa u la ialam shim dawai ia i khun jong u na sha ki thain Mawngap -Marbisu, hynrei ha shiteng lynti, ula kiew da kawei ka Sumo bad ka dei ha katei ka lynti, hapdeng ka Mawngap bad ka Ladmawreng, ba ki don ki briew, kiba wan kiew sa kumba 3,4ngut ban shong ha katei ka Sumo bad ka dei ruh hangta hi, ba ki la shah ktah kti bad ba ynda la dep leh ia katei ka kam pyntriem, ba la bret noh ha katei ka jaka ha jan katei ka jingkieng.
Na ka liang u nongthohkhubor u la wad jingtip ia katei ka jingjia na ki pulit lyngba u OC ka Mawngap out Post, hynrei u OC u la ong ba ki pulit kim shym la ioh jingtip eiei.
Ban pynthikna ia katei ka khubor, u nongthoh khubor u la ioh ban ia kren bad U Rangbah shnong jong kawei na ki dong ha Mawngap, ha kaba u la ong ba kam don jingtip ba thikna haduh ban ong eiei ha ki kot khubor, hynrei u la kam ba kiba la shah ktah ha ka jingjia kim dei napoh shnong, bad um don jingtip la kitei kiba hap ha katei ka lanot ki dei na kano ka jaka, bad sa kawei ruh u la ong ba ka dei ka jingjia kaba hapoh khlaw- ha lynti syngkien ka bym hap shuh hapoh ka jingpeit ka shnong.
U nongthohkhubor u la ioh iakren ruh bad u bah Edward Kurbah , Secretary Hima Marbisu ban kylli shaphang katei ka jingjia , na ka liang utei u rangbah u la kubur ba u la iohsngew wur-wur-wer-wer ba ka don kum kata ka jingjia, u la ong pat ba ym iohsngew khubor eiei ban don kiba shah leh kumta kiba na ka thain Marbisu, bad u la ong ruh ba um tip la kita ki nongshah leh ki dei naei.