| Jowai: Ka AJYWO Central Body ka pynpaw ia ka jingbitar ia ka MeECL na ka daw ka jingbym biang ka rukom ai bording ha Jaintia Hills kaba la ktah jur ia ki paidbah bad khamtam eh ki khynnah skul, shi kat dei eh. “Ka jingbym biang ka rukom sam bording jong ka MeECL, la katto katne bnai, ha Jaintia Hills ka la ktah jur khamtam ia ki khynnah skul ha ka pule puthi jong ki bad ruh ia ki paidbah jong ka thaiñ naduh ki longing-longsem ki ophis sorkar, ki dukan, bad kiwei kiwei ki dei ki de ki bynta”, ong u Bah Reachingson Siangshai, Vice President jong ka AJYWO. Ka AJYWO ka pyrshah jur ia ka jingpynlip bording (load shedding) jong ka MeECL ha ka por mynmiet naduh 9:00PM namar ka dei ka por ha kaba ki paidbah ki donkam bha ia ka bording. Ka seng kam lah ban pdiang ia kane ka jingleh jong ka MeECL. Ka seng ka isynei palat ban iohi ba ki khynnah pule ba ki hap pyndonkam da ki mombati ne ki emergency light ne ki sharak, kiba ktah bha ia ki khmat jong ki nalor ka jinglut jingsep kaba heh. Ka AJYWO ka pynpaw ruh ba katei ka jingleh jong ka MeECL ka wanrah ia ka jingktah kaba jur ia ki longiing kiba duk namar ki hap ban siew ar tylli ki bill, nalor ka bai bording kaba heh hynrei kaba khlem ioh ban pyndonkam ia ka bording kumba paw ha ka bill, sa ka bill jong ka jingpynlut ban pynioh ia ki mombati ne sharak ne emergency light. “Shaei jah ka pisa bill light ba la siew da ki paidbah man la ka por kaba pynlong ia ka MeECL ban ym lah ban pynbiang bording thikna ia ki paidbah? Shaei jah ka Power Department jong ka sorkar jylla ba ka MeECL ka ioh ban pynsoh sat ia u paidbah haduh katne katne?”, buh jingkylli u bah Siangshai. “Ka bording ka long kawei na ki jingdonkam kaba ha khmat eh ha ka juk mynta hynrei kane ka rukom sam bording ka MeECL kat kum ba ka long mynta, ka pyni kumba ngin leit phai biang sha ka Juk Maw (Stone Age)”. Ka MeECL ka dei ban kheiñ duna noh ia ka bill light ha kine ki por kiba ka bording kam shym biang ha ka thaiñ”, ong shuh shuh u kyrwoh na ka AJYWO. Ka AJYWO ka dawa jur na ka MeECL ba ka dei ban pynbiang bording thikna ha Jaintia Hills naduh nangne sha khmat, lym kumta, kane ka jingbym biang ka bording ha ka thaiñ, kan pynbor ia ka seng ban tih bniah la ki paidbah kim shym la siew bill light ne em man la ka por, bad lada ki shait siew, shaei jah ka pisa bill light pat kaba pynlong ia ka MeECL ba ym lah ban pynbiang thikna iaka bording ha ka thaiñ? Reachingson Siangshai, Vice-President, AJYWO-CB. |
Phi don ban ong eiei?