Synei sat halor ka jingshah rem U bah Jemino

Bah RM Shabong

Ka elekshon Lok Sabbha, ka la wan rah ia ka jing sngew synei sat ia U bah Jemino Mawthoh, kandidet jong ka seng UDP, ha kaba ula shah rem kput ha U Ma Vincent Pala, kandidet jong ka seng Congress.
Ngim tip ia kiei ki daw poh iing, kiba don ia utei u kandidet bad ia ka seng, kaba la pynmih ia u, kum u kandidet, hynrei, la iohi ba ki MLA jong ka seng UDP, kim shym la lah ban iarap ia u briew lajong bad ka nuksa kaba khraw tam, ka long ba U President jong ka seng UDP, um shym la lah ban pynjop ia u kandidet jongu, na ka Constituency jongu ha Shella bad kam kut tang katta, la iohi shuh shuh ba ki don sa shibun kiwei pat ki Constituency kum ha Mairang, kaba don sa uwei pat u nongialam ba radbah jong katei ka seng, hynrei hangtei ruh um shym la jop satia bad katei ka pyni shai ba ka jingkitkhlieh jong ki nongialam UDP, ka hiar shi katdei.
Haba peit naduh kaba sdang ia ka jingshong shit jong ki nong ialam UDP, ban pynioh tiket ia U bah Jemino, ha ka shap jong ka bom, ka la long kaba la palat liam, ha kaba ki la shu brut da ka jubor justi ia ki paralok kiba ia treilang ha ka sorkar, lada dei ia ka NPP ne wat ia ka HSPDP bad kiwei, hynrei la iohi ba mar ia ioh tiket, ki shim ba ki la ioh rah suk ia ka jingjop bad ka jingtrei jongki, ka long kaba mian mian sat bad hangta kein ba u sa syllad naphang u kandidet ka seng Congress.
Mynta ki nongialam jong katei ka seng, kin pyrshang ban rieh tngen, halor ka jing ia don bynta jongki bad ka sorkar ha ryngkat bad ka BJP, hynrei lada ki ai daw kumta, katei ka pyni, ba kan dei tang ka nia jiei suda, namar ba ialade lei, ki la sdang ban leh kiar bad ki la weng noh na ka jing ia don bynta lang bad ka NEDA, hynrei ka NPP, ka kren shai ba haduh mynta ka iai don bad ka kynhun jong ka seng BJP, hynrei ka rah da kaba suk ia ka elekshon MLA ha Selsella bad kumjuh ia ka elekshon MP ha Tura.
Mynta ka la dei ia U Bah Jemino, ba un tih tyllong bha ia ka daw rem jongu, namar ba uba nabar, lei un ioh daw ban kynnoh pynban, ba imat ki nongialam jong ka seng UDP, ki kyrshan buhrieh ia u kandidet jong ka seng Congress bad lada ka long kumta, kan dei ka jingshet kylla kaba jubor tam ia utei u samla rangbah.