Weng pakhang shnong ha EJH

Shillong,30 Iaiong:
Ki 5 seng ha Ri Lum Jaintia ba kynthup ia ka Jaintia SRS-EJH, AJYWO-CGB, KSU-JHDU, HNYF-EJZ bad ka FKJGP-KC ki la weng noh iaka jingpynbna jong ki kham mynshuwa ban khot da ka pakhang shnong ba 48kynta hadien ka jingiakynduh jong ki bad u Deputy Comissioner ka East Jaintia hills u bah WR Lyngdoh ha kaba u la kular ha khmat jong ki ba ka jingmaramot ia ka NH 44 kan sdang noh naduh lashai ka sngi ha ki bynta ba la sniew palat.
U DC ka EJHD u la pyntip shuh shuh sha ki nongialam jong kitei ki san seng ba ka NHAI ka la mang haduh T. 5 klur tyngka sha ka tnad PWD (Roads) jong ka sorkar jylla na ka bynta ban sdang ia ka kam wut wut na ka mang kaba T. 24 klur tam na ka bynta ban maramot ia katei ka surok . “Namar ka jingkular jong u DC ka EJHD ban sdang maramot noh ia ka NH 44 lashai ka sngi, ngi la weng shwa shipor ia ka jingiakhih jong ngi bad ngin sa peit lada ka sorkar kam bat la ka kular ngin ym sngap shuh ia ki kyntien jail jaum jong ka sorkar hynrei ngin iaid beit sha khmat da ki jingiakhih kiba tyngeh”, ong u kyrwoh na ki san seng.