Ki Scheduled Tribe ha Meghalaya

Ha ki khyndiat sngi ba ladep, ngi dang ia pule ia ka jingshem lanot jong ki para Khasi jongngi, kiba shong ha Them Barak, ha kaba mynta la 8snem kynthih, kim ioh ia ki Scheduled Tribe Certificate jongki, hynrei, la ai pynban, da kawei ka sengbhalang lane kata kaba ki ong Tribal Sangha.
Haba poi pat ha Meghalaya, la iohi ba baroh kiba shong ba sah hangne, ki ioh bylla ki lad ki lynti bad ki jingmyntoi bad kitei ki long, naduh ka shongkha shongman, ka shongiing shongsem, ka thied jaka puta, ka trei ka ktah bad sa kaei pat kaba ki kwah ba kim ioh bad hangne ki ioh lut khoit.
Phai sha Nongthymmai, sha Madanriting, Laitumkhrah, Umpling bad kitei ki jaka ter ter, la iohi ba ki la shlei mam, da kita ki jaitbynriew tribal, kiba na Arunachal, Sikkim, Nagaland, Manipur, Mizoram bad kumta ter ter bad sa kiwei kiwei de bad kitei ki ioh lad kaba kylluid ban shim ia kajuh ka bhah, kaba ki Khasi Pnar, ki ioh ha la ka jong ka Jylla bad ki ophis sorkar kmie lei ki ithuh mar ryngkat ha ka ioh kam ioh jam, ha ka pule puthi bad wat ha ka bhah kam bhah jam, namar ba ka kyntien Scheduled Tribe, ka thew ia baroh bad kam dei satia tang ia kiba na Meghalaya.
Mynta ngi iohi, ba kitei ki tribal kiba na kiwei ki Jylla, ki la nang dap bad ki la nang ioh ban rung khlieh ha ki dong bapher jong ka thain bad lehse, ki nongialam shnong jong ka thain Nongthym mai, ki iohi bha ia katei, namar ki la dep mad bad ia kynduh dalade hi, halor ka jinglong jingman ka shong ka sah bad ka jing ia rung ia mih jong kitei ki jaitbynriew.
Ngim don lad shuh ha kine ki sngi bad ka jingshisha, ka kren shai ba U Khasi Pnar hi, um ioh iing shuh ban sah iing wai, um ioh iing shuh ban shong dukan bad ki trai shnong, ngi la iohi, ba ki la nang kynriah bad ki la nang tur sha ki nong kyndong, katba ki briew kiba nabar, ki la nang bsuh khlieh ha ki dong bapher jong ka pdeng bah jong ka Shillong bad ha ki phew snem ban sa wan, ngin sa iohi ba na Malki shaneng (lehse), kan don ka jing ia shong kha khleh, ka jing ia khleh jaitbynriew, ka jing ia knieh ia ki kam ki duk bad kumta ter ter bad kata ka long hapdeng ki para riewlum hi. [rms]