Pynkhreh ki nonghikai Adhoc ia ka lumpung bah

Shillong: Ki nonghikai skul Adhoc ha ka jylla kynthup naduh ki Lower haduh Higher Secondary ha kane ka sngi Saitjain, ki la pynlong ia ka jingiakynduh lang ha Khasi National Dorbar Hall, Shillong bad ka la rai ban pynlong ia ka lympung bah ha ki sngi ban wan.

Ha kane ka jingialang, ba la wan iashim bynta da ki hajar ngut ki nonghikai na East Khasi Hills, Jaintia Hills,West Khasi Hills, Garo Hills bad kiwei kiwei.
Ka thong jong kane ka jingiakynduhlang ka long ban pynkhreh na ka bynta ka jingwan jong u Ramdas Athawale, uba dei u Myntri ka sorkar India ba peit ia ka Social Justice & Empowerment ha ka jingialang bah jong baroh ki nonghikai Adhoc ha ka jylla kaba la khmih lynti ban pynlong hapoh ka 3 bnai mynta u snem 2019.
Ha kane ka jingialang bah, ki nonghikai ki la pynsngew ruh ban iadon lang da u Myntri Rangbah ka Jylla, u Conrad K.Sangma bad u Myntri ba peit ia ka Pule puthi ka Jylla u bah Lakmen Rymbui.
Ha kane ka sngi ki nonghikai baroh ki la pynpaw ia ka jingiatylli lang ban iatrei na ka bynta kane ka jingpynkhreh bad ka jingangnud jongki ba la slem bah ban pynioh Deficit noh ia ki nonghikai Adhoc ha ka jylla khamtam ban buddien ia ka shithi ba la ioh pdiang na ka Sorkar India lyngba u Ramdas Athawale, uba la phah sha ka sorkar jylla bad sha u nongialam ban shimkhia ia kane ka jingdawa ki nonghikai.
La ioh ruh ia ka jingkren na ki nongmihkhmat bad nongialam bapher bapher kynthup ia u Senondro Marak, u bah Sanbor jong ka Secondary bad kiwei kiba la pynpaw ia ka jingiatylli bad ban iatrei lang na ka bynta kane ka jingpynkhreh bad kaban ioh pynurlong noh ia ka Deficit hapoh u snem 2019.
U bah Kenneth Shadap kum u nongialam u la pynsngew ia ka shithi ba la ioh pdiang na u Myntri ka Sorkar India, bad buh ruh ia ka thong ba dei ban urlong hapoh mynta u snem da ka jingiatreilang bad don ka jingmut kaba beit khnang ba ki kam kin iaid beit.
Ki nonghikai ki la shim ruh ia ka rai ba na bynta kane ka jingpynkhreh ia ka jingwan u Ramdas Athawale, kin ia noh synniang mar T. 200 marwei, na ka bynta ki jingdonkam.