|
Shillong: Shisngi shuwa ban pynbna ia ka resol elekshon MP ki nongkyrshan ba hakhmat ka UDP Na Sohra ki la duh jingkyrmen lypa bad ki artatien ba u kyrtong ka NDA u Dr.Jemino Mawthoh un jop na katei ka konstitwensi.
Ki nongkyrshan ka UDP ki la kynnoh ba ka PDF ka la leh arsap bad ka khlem trei satia na ka bynta u kyrtong ka MDA hynrei ka la kyrshan ia ka seng Congress.
Haba iakren bad uwei na ki nongialam ka UDP na Sohra u bah Chesterwell Marbaniang uba bat kum u Asstn. Secretary ka UDP Sohra Circle, u la ong ba ki nongialam bad ki nongkyrshan ka PDF ki la iathuh ba ki kyrshan ia ka Congress lyngba ka jingbthah jong u MLA u bah Gavin Mylliemngap bad u la iathuh ba ki ong ba kim lah ban leh pyrshah ia ka hukum u MLA.
Shuh shuh u la iathuh ba ka jingkyrshan Congress ki PDF ha Sohra konstitwensi ka la paw tyngkrein ha ka sngi thep vote ha kaba ki PDF ki ia dihsha sngewbha lang bad ki Congress bad ia ka jingpynlut la tip hi na u MLA uba dei na ka seng PDF.
U bah Marbaniang u la ong ruh ba ki nongialam ka PDF ki kren shai sha ki nongialam ka UDP ba ki kwah eh ban ia treilang ban kyrshan ia u Dr.Jemino khamtam ba ki ia donlang ha kajuh ka sorkar hynrei kim lah pat ban leh pyrshah ia u MLA jong ki uba la bthah ban kyrshan ia ka seng Congress.
U la ong ba ka jingiakhun ha kane ka elekshon MP na Sohra konstitwensi hi ka dei beit tang hapdeng ka UDP bad Congress hynrei da ka jingleit kyrshan jong ka PDF pat ka Congress kan tam kput ia ka UDP na Sohra konstitwensi.
|
Phi don ban ong eiei?