Ngin ap ha ka 23 tarik, wat la, la iathuh lypa ban jop biang ka NDA:Conrad

Shillong:  U Myntri rangbah ka jylla u Conrad K Sangma u la ong ba watla ki lad pathai khubor ki la iathuh lypa ba ka NDA kan wan biang ha ka bor hynrei kaba kongsan ka long ban ap haduh ka 23 tarik kaba dei ka sngi niew ia ki vote.

Haba kren sha ki lad pathai khubor mynta ka sngi, u Conrad u la ong ba katkum ka jingiathuh lypa, ka jingkhein kyllum ka la kdew shai ba ka NDA kan wan biang ha ka bor hapoh ka jingialam u Myntri Rangbahduh ka ri u Narendra Modi.

U la ong ba kumba ka paw ka jingwan biang u Modi ha ka bor, kan pyni ba ki paidbah ki shaniah bad ki hun ia ki jingtrei jongu ha kine ki san snem ba la dep.

“Ka jingiathuh lypa ka ai ia ka phang bad katkum ka jingkhein kyllum ka NDA ka lah ban wan biang ha ka bor bad kane ka dei ka jingiathuh lypa ha kaba u Modi un wan biang namar ba ki paidbah ki sngew hun ia ki kam jongu hynrei ngin hap ban ap ia ka result ba shisha”, la ong u Conrad.

Hynrei ha kaba iadei bad kane ka jylla, u Conrad u la ong ba ki ar ngut ki kyrtong ka MDA kin jop beit ha kane ka kynti. “Ka MDA kan jop na baroh ar tylli ki na Shillong bad Tura”, la ong u Conrad.