Dawa ka Warmawsaw-Umsohbar Raid Land Ribhoi Council, Hima Nongspung ban ithuh noh ia ka Raid

Shillong: Ka Warmawsaw-Umsohbar Raid Land Ribhoi Council, Hima Nongspung ka la dawa na ki bor jong ka Khasi Hills Autonomous District Council (KHADC) lyngba jong u Chief Executive Member (CEM) ba kan ithuh noh ia ka Warmawsaw-Umsohbar Raid Land Ribhoi Council kaba hap hapoh ka Hima Nongspung kum ka Raid kaba pura kumba long naduh hyndai hynthai kulong kumah.

Halor kane ka Warmawsaw-Umsohbar Raid Land Ribhoi Council ka la leit bah buh ia ka dorkhas ha ka ophis jong u CEM ka KHADC ha kaba ka la pyntip ba katkum ka rai jongka Dorbar ha ka 23 tarik u Lber 2013 ka la kwah ban pynithuh ialade kum ka raid hapoh ka Hima Nongspung.

Ka Dorbar ka la kdew ruh ia ki nongrim kiba ka la ieng ba ka dei ka Raid kaba pura namar ba naduh hyndai hynthai la synshar katkum ka riti dustur da ki basan ka raid Warmawsaw bad Umsohbar naduh ka snem 1860 eiei.

Ha ka mat kaba ar, ka Dorbar ka la kynnoh ba u Syiem bad ki ba khraw jong ka Hima ki la synshar ha ka jinglong khwan myntoi da kaba kynnoh ruh ia u Syiem Peter Syiemiong bad u Acting Syiem Medrick Rani kumjuh ruh ia u bah Michael Warjri ba ki leh donbor bad iuhroit ia ka riti dustur.

Haba kren bad ki lad pathai khubor ha ka 20 tarik u Jymmang 2019 hadien ba ki la leit ban buh ia ka dorkhas ha u CEM ka KHADC, u bah Manason Doloi u la ong ba ka jingsynshar hapoh Hima Nongspung ka long kaba kulmar ha kaba u “Syiem u dei ban long u Syiem u kmie pynban u long u Syiem u Rakot.”