|
Shillong: Ka Warmawsaw-Umsohbar Raid Land Ribhoi Council, Hima Nongspung mynta ka sngi ka 20 tarik u Jymmang 2019, ka la iakren bad ki nongthoh khubor, halor ki kynrum kynram ki ba mih ha ka 7 tarik u Jymmang 2019 ha ing u secretary shnong ka Balakhawa, u bah Michael Warjri.
 Katkum ki kot ki sla ba la pynthikna, katei ka jaka ka hap hapoh u pud u sam jong ka Meghalaya bad ba ki jingjia ki jia hadien ba ka sorkar Assam ka la shna ia ka surok ha ki jaka hapoh u pud u sam jong ka Meghalaya bad kam dei ba ka sorkar Assam ka wan knieh hynrei ka dei tang namar ka jing ailad jong ki briew na shnong da kaba ai NOC.
Katkum ka jingiathuh jong u Sirdar Shnong ka Umsohbar Raidland Nongspung Syiemship, u bah Manoson Daloi, la ong ba dei u Syiem ka Hima Nongspung u Petrick Syiemiong ryngkat bad u bah Michel Warjri, Secretary ka Hima Nongspung ba la ia soi bad u MLA ka Assam u Ravindar Narayan Kalita.
U bah Manoson Daloi u la ong, “Kum ba la pynpaw ha ka pyrthei ba u bah Michel u dei u ba khang ia ka ne ka surok ban pynthame ia ngi ba u dei u nongiada jong ka ri hynrei ngi lap ba dei u bah Michel Warjri hi uba ba ai ia ka NOC.”
U bah Manoson Daloi u la ban shuh shuh da kaba ong, “U bah Michel, u Syiem ka Hima Nongspung bad u MLA ka Assam, u Ravindra Narayan Kalita, hadien ba ki la dep ia soi ia ka ne ka NOC u la ai ki copy sha ka Sorkar Meghalaya ha ka ba u bah Prestone Tynsong ruh u la ioh ia ka” bad mar kumta hi ka sorkar Assam ka la sdang ban pyntrei ia ka surok, kaba na Garolik lyngba ka Patgang sha Balkhawapara, ki la dep pyntrei bad kaba sah ka long na Maw Dawki haduh Jimrigaon, ia kaba ki dang pyntrei shaid shaid.
U bah Manoson u la kynnoh shuh shuh ba u “Syiem bad ki baheh jong u kynthup ia u Joint Secretary ki don ka jingiadei bad kane ka kam ban ia soi ia ka agreement.”
U bah Manoson u la pynshai da kaba ong, “Namar ka jingkhang jong ki ia ka sorkar Asssam kam shym long ban khang ia ka jingshna surok, hynrei ka dei namar ba ki nongtrei kim don ia ka trading licence na ka KHADC, bad ia kata ki la leh ha ka 21 tarik u bnai June 2018.”
“Te ki kontrak jong ka Assam ki khlem sngap ia kane, kumta dei na kane ba la sdang ka jingkulmar,” la pynshai u bah Manoson Doloi bad u la ban jur ba kadei ka jingleh jong u bah Michael Warjri da kaba khang ia ka lynti bah sha Maw Dawki.
|
Phi don ban ong eiei?