Shah U DC ban shong kyr-ain ka UDP ha Addl sectt

Shillong, 28 Iaiong:
U Deputy Commissioner ka East Khasi Hills district u la shah ia ka UDP ba kan pynlong ia ka jingshong kyr-ain ne kyllain myngor hakhmat ka Additional Secretariat lashai ka sngi ka 29 tarik Iaiong ban pyrshah ia ka jingpynlip bording palat ha kane ka jylla, kaba la ktah ia ki kam ki dup jong ki paidbah.
“Ngi la iakren bad u Superintendent of Police (SP) ka East Khasi Hills u Bah M Kharkrang halor kane ka kam. U SP um shym la iohi ban don kano kano ka jingeh ban mih ban pynlong ia ka jingshong kyr-ain ban ialam da ki MLA,”, la ong u Deputy Commissioner u Sanjay Goyal.
Shwa ia kane, ka UDP ka la kyntu ia ki paidbah ban wan iashim bynta lang ha kane ka jingshong kyr-ain ban pynpaw pyrshah ia ka jingpynlip bording ha kane ka jylla.
Ia kane ka jingshong kyr-ain yn ialam da u MLA ka Nongthymmai uba dei ruh u working president ka UDP u Bah Jemino Mawthoh.