|
Shillong: Ka Federation of Khasi Jaintia and Garo People (FKJGP) ka la plie pyrda ia ka jingrakhe jong ka jingdap 30 snem jong ka seng da ka jingialang kaba la pynlong kyrpang hynnin ka sngi 18 tarik u Jymmang 2019 ha Polytechnic Mawlai Shillong ha kaba u President barim jong kane ka seng u Ardent M Basaiawmoit, u bah Sanbor Shullai, u Bah Sounder Strong Cajee, U bah A L Hek bad U bah Titos Chyne ruh ki la iadon lang.
 Haba kren kum u kongsan kane ka sngi u Myntri ka koit ka khiah u bah A L Hek u la ai ka jing iaroh ia ka seng FKJGP kaba la kynjoh sha une u mawmer lyngba ka jingtrei shitom bad ka jingnoh synniang met bad mynsiem na bynta ka bha ka miat jong ka jait bynriew.
U kongsan ha kane ka sngi u la pynpaw ka jingkmen haba u kynmaw biang ia ki por ba ryngkat bad u President ba nyngkong jong ka seng u bah S.S Cajee ki la ia hiar sha ri lum Garo ban pan ka jingkyrshan na ki paid Garo kiba la kloi ban ia snoh kti lang bad ka seng.
 Haba ai ki kyntien sneng ia ki nongialam seng bhalang u bah A L Hek u la pashat da ki symboh pyrkhat da ka ba ong, “Lada phi kwah ban long ki nong ialam kaba nyngkong kaba phi dei ban leh ka long ba phin ialam shuwa ia lade da ka ba sdang na la ing nangta phin sa long ki nongialam ki ba tbit.”
U symbud kongsan ha kane ka sngi u bah Titos Chyne u la ong ba watla u la shong shuki kum u nong mih khmat sha ka Khasi Hill Autonomous District Council (KHADC) ruh um shym la klet ia ki nongrim jong ka seng ka ba ieng halor ka hok ban iada ia ka ri bad ka jait bynriew ki para doh para snam.
Ha kane ka sngi la pynbam smai ia ki nongkit kam ba thymmai jong ka seng ha ka ba la pynskhem ruh ia ka Central Executive Committee jong ka seng.
Kum ka dak jong ka jingiaroh bad ka jing kyrshan ia ka seng FKJGP u bah A L Hek bad u bah Sanbor Shullai ki la noh synniang sbun mynsiem mar 1 lakh tyngka na ka bynta ban thied jaka ha kaba yn shna ia ka Ophis trei kam jong ka seng.
|
Phi don ban ong eiei?