Ka samoi treikam ka MRDS ka la kut katkum ka soskular

Shillong, 28 Iaiong:
Ka sa moi treikam ka Meghalaya Rural Development Society (MRDS) ban pyntrei kam ia ka IFAD Projek ha kane ka jylla, ka la kut ha u Jylliew, 2013 katkum ka soskukar.
“Katkum ka sosku lar ba la iateh, ka sorkar Meghalaya kan pyntrei kam ia kane ka projek phra snem naduh u snem 2005 haduh 2013, kaba long 8 snem”, la ong u Project director ka MRDS u Bah A Suting haba iakren hynne ka sngi Nyngkong bad u Rupang.Kham mynshwa, ki Self help Group (SHG) na kylleng ki jaka jong ka jylla kiba hap hapoh ka jingpeit ka MRDS, ki la kiew lienglieh iingsaw halor ka jingmut dur ba ka sorkar ka la thmu ban pynduh noh ia ka MRDS.
Hynrei katkum ka jingong u Bah Suting, kane kam dei kaba ka sorkar ka thmu ban pynduh ia kane ka IFAD projek hynrei ka la kut hi katkum ka soskular. “Nga tharai lah ban don kiba pynsngewthuh bakla ia kane, namar ba kam dei ba pynkut ka sorkar ia ka IFAD projek, hynrei dei ba la kut ka soskular”, la ong u Bah Suting.
Katkum ka jingong u Project director, ka jingialang ban pynwai noh ia ka MRDS kan sa long ha u bnai Jymmang ne u Jylliew mynta u snem.
U la ong ba ka jingpynkut noh ka sorkar ia ka MRDS ka dei ba ka IFAD projek ka la kut hynrei kam mut pat, ba tang ba la kut ka IFAD projek, ka sorkar kan shu ieh kumto ia ki SHG hynrei ka shong ha ka sorkar ba kan thaw pat ia kiwei ki lad ki lynti ban btin lynti shuh shuh ia ki SHG. “Ki SHG ruh kim dei ban shu ap jingiarap na ka sorkar, hynrei shisien ba ki la ioh jingstad, ki dei ban ieng ha kijong ki kjat”, u la ong.
Ka MRDS ka la treikam ha ki san tylli ki district ka jylla lait noh ka East bad West Garo Hills. Ha kine ki san tylli ki district la lah ban thaw 2300 tam ki SHG bad kumba T.171 klur la pynlut ban kyntiew ia ki SHG. “Baroh ki shnong ba la lah ban kdup da ka MRDS ban seng ia ki SHG ki long 790 tylli”, la ong u Bah Suting bad bynrap, ba kane ka long kaba duna ban ianujor bad ka jingdon jong ki shnong ha ka jylla baroh kawei.
Katkum ka jinglap, la don kumba 60 percent eiei ki SHG kiba la lah ban treikam bha bad ban ieng ha la kijong ki kjat lyngba ka jingbtin lynti ka MRDS, la ong u Bah Suting.