Dawa ka JSU, ban sam bai thang ding man u bnai sha Amlarem

Shillong: Ka seng Jaintia Students’ Union (JSU) hynnin ka sngi, ka la  leit kynduh ia u Ophisar SE Commercial ka MeECL ha ophis headquarter Lumjingshai ha Shillong.Ha ka jing kynduh ka seng, ka lah dawa ba ba ki nongshim bill light jong ka MeECL ki dei ban wan ai ia ka bill light man la u bnai, khlem da pynsah teng da kiba bun bnai ia ka bill light sha ki shnong nongkyndong jong ka thain Jaintia khamtam ha ka thain Amlarem sub division, namar ki nongshnong shnong ki shem jingeh ban siew shi sien siew iaki bill light kiba sah teng da kiba bun bnai.

Ki paidbah ka thain ki lah ujor sha ka seng halor ka jingkhein sting ka tnat MeECL namar ki nongtrei kim   ju wan shim bad wan peit ia ki meter reading ha man la ki bnai hynrei ki buh teng da kiba bun bnai hadien 4 ne 5 bnai bad kane ka buh jingeh ia ki nongshong shnong kiba duna ka kamai kajih ban siew ia ka bill light kiba poi da ki hajar tyngka shi shen siew ha juh ka por.

Kumta na ka liang ka seng ka lah dawa ruh ba ia ki nong wan ai bill light,  ki dei ban wan tikna ha man la u bnai ban pynsuk ia ki nongshnong shnong ka thain baroh kawei namar lada ki siew tang ha ka shi bnai kan pynsuk ia ki ban siew ia ka bill light kaba duna kaba poi ym duna ia ka 300 ne 150 tyngka shi bnai.

Ka seng ruh ka lah kyrpad ia ka MeECL ba ia ki bill light kiba lah sah slem kiba ym pat dep ban siew lut da ki nongshnong shnong ha ki snem kiba lah dep dei ban ai lad ia ki nongsiew ba kin siew da ka bynta bynta (quarterly instalment )ym ban siew shi sien don ha kajuh ka por namar kane ka ktah ia ki nongsiew kiba duna ka ioh ka kot ha ki shnong nongkyndong.Ka seng ruh ka lah kyrpad ba lada dei ban map katto katne eh ia kito ki bill barim kan khambha shuh shuh namar don ko por ba ki meter ki lah duh noh ne ki lah rim bad kim trei kam shuh bad ka seng ka lah dawa ba ia ki meter barim baroh dei ban buh noh da kiba thymmai namar kane yn pynsuk ia ka jingpyndonkam ia ki bor ding ha ki ing sah bad ka jingoh dor ia ki bill light kan long kaba beit bad kaba shai.

Na ka liang ka MeECL ruh ka lah mynjur ban peit bniah ia ki bill light barim, lada dei ban hap pynduna ne ban ai lad ba ki nongsiew kin siew da ka instalment ne da ka bynta bynta ha ka shi snem ban pynkhuid ia ka bill light kiba dang sah ha ki snem kiba lah dep.