Khein ka Assam, ia ki Khasi kum ki mraw?

Ka la nang paw pyrthei, ka kam thombor jong ka Assam ia ki Khasi, kiba don ha katei ka Jylla bad katei ka long ba wat tang ban ai Scheduled Tribe ruh kam treh satia, hynrei, ka aiti ha kawei ka sengbhalang bad kam dei satia ka seng jong ka sorkar lane kaba ki ai kyrteng ka Tribal Sangha bad ka kam jong katei ka seng, ka long ban ai syrnot jinglong trai shnong ia ki Khasi kiba don ha Assam, haduh kumba ar lak tam.
Katno ka long ka jingleh niewbein ia ki Khasi bapli, ha kaba kam pat ju don ka ain jong ka sorkar ban aiti ia ki kot ki sla kiba long ain sha kiwei pat ki kynhun seng, kumba leh ia ki Khasi.
Ngi tip, ba ka Assam, ka lah ban nym ithuh ia ki Khasi, kiba don ha katei ka Jylla, kum ki traibal (lehse lada ka sngew dei), hynrei ban aiti sha kiwei pat ki seng, ka la nang pyni, ba ka dei ka kam pap, ka kam thombor, ka kam leh niewbein bad ka jingkhein ia kitei ki nongshong shnong, kum ki mraw jong katei ka Jylla.
Ngim pat ju tip bad kam pat ju jia hi ruh, ha ka dong shatei lam mihngi, ba ia ka hok nongshong shnong jong kano kano ka jait bynriew, yn ithuh pynban da ka kynhun sengbhalang bad katei ka dei ka jingleh jot kaba la palat liam, da ka Assam, ia ki trai shnong Khasi, kiba la im ha katei ka Jylla, da ki spah snem mynshwa.
Halor kane ka jingleh, ka pyni shai ba ka sorkar Meghalaya, ka la ailad than ia katei ka Jylla ba marjan bad ba kam shym la nud ang ruh shi kyntien, ban iakren ia kat katei ka kam niewpoh ia la ki jong ki trai shnong, kiba ka India, ka tip bad ka ithuh shai ia ki, ba ki dei ki rit paid bad ki traibal.
Mynta ngi sngewthuh ba ki bor District jong ka Them Barak, ki la mynjur ban ai noh dalade ia katei ka Scheduled Tribe certificate, hynrei katba ka jia, ka pyni, ba ka dei ka jingleh kaba ngin nym lah satia ban pdiang, namar ha ki hynniew snem ba ladep, ka la don ka jingkhanglad ha ka ioh kam iohjam, ka pule puthi bad wat ha ka shong ka sah jongki, lada ki kwah ban wan phai sha Ri Khasi Jaintia bad katei hi ka thew, ba ia kitei ki 2lak ngut, ka don ka jingthmu ban ithuh shipor ia ki, tang ha Assam bad hadien pat, ban sa mait noh, namar ba kam dei ka hukum jong ka Sorkar. [rms]