Kyntait U Syiem ka Hima Nongspung, ba ai mynjur ia ka Assam

Shillong: U Syiem ka Hima Nongspung, u Paiem Patrick Syiemiong, u la kyntait ia ka jingkynnoh ban ai No Objection Certificate (NoC) ia ka Sorkar Assam ban shna ia ka surok na ka skhim Pradhan Mantri Gram Sadak Yojana (PMGSY) kaba pyniasoh ia ka West Guwahati, Assam bad ka New Balakhawa, Ribhoi District.

Hynnin ka sngi, u Symbud Myntri Rangbah ka Jylla, u Bah Prestone Tynsong u la ong, “Katkum ki kot ki sla, dei ka Hima Nongspung kaba ai ïa ka No objection Certificate (NoC) ne ka jingbit ban shna ïa ka surok PMGSY ha katei ka jaka.”
“Kiba kren (Symbud Myntri Rangbah) sha ki lad pathai khubor kin sngewbha ban ai kopi lem ia nga,” ong u Pa’iem Patrick Syiemiong.
U la ong ruh ba ka surok PMGSYka dei ka projek jong ka Sorkar Pdeng, kumta kam don jingpher ei ei lada shna da ka Sorkar Meghalaya lane ka Sorkar Assam namar ka jingmyntoi ka dei hi na ka bynta ki paidbah nongshong shnong ha ka thaiñ khappud.
“Nga sngew kyndit haduh katta katta ban iohi ha ki kot khubor ba ka la mih ka jingkynnoh ba nga ai NoC ia ka Sorkar Assam ban shna ia ka surok PMGSY ha Balakhawa,” pynshai u Syiem ka Hima Nongspung.
U la ong ba um don jingtip eiei ia ka jingai ia ka mynjur, namar ba um ju pdiang ia kino kino ki kam kiba wan na Assam.
“Ngam don jingtip eiei halor ka jingai NoC namar lada wan kano kano ka kam pynroi na ka Assam ne ka jingwan thung nar post electrict ruh nga ujor bad nga pyntip sha ki bor ba dei peit,” bad bynrap, “kumno nga ai ia ka NoC haba nga dang khang pyrshah bad halor ka jingai NoC ia ka Sorkar Assam mano ba ai ngam tip”, u la ong.
U Paiem Patrick Syiemiong u la iathuh ba un sa lum ia ka Executive Committee jong ka Hima Nongspung ha ka lah sngi u Blei jong ka taiew ban wan khnang ban tohkit bniah mano ba donkti ban ai ia ka NoC sha ka Sorkar Assam na ka bynta ban shna ia ka surok na ka skhim PMGSY.
U la ong ha ka por ba u MLA ka West Guwahati u la phah da ka jingthoh ban ailad na ka bynta ban shna ia kane ka surok, u la pyntip mar mar sha u Myntri Rangbah bad sha u Deputy Commisioner.
Ha kaba iadei bad ka jingpynbna jong u Deputy Chief Executive Member (Dy.CEM) ka Khasi Hills Autonomous District Council u Bah Pyniaid Sing Syiem uba peit ruh ia ka tnat Elaka ban khot hajir ia u Syiem ka Hima Nongspung bad ia ki nongialam jong ka Hima, u Paiem Patrick ula ong ba haduh mynta ka KHADC kam pat ai ktien eiei hynrei ia kane ka jingpynbna la shu iohi tangba lyngba ki kot khubor.