Bud ia ka nuksa u GS barim, ong u bah Prestone ia ki HNLC

Shillong: U Symbud Myntri rangbah ka jylla, u Bah Prestone Tynsong u la wer ia ki dkhot ka HNLC ba ki dei ban wan shakhmat ban bud iaka nuksa jong u bah Cheristerfield Thangkhiew uba dei u General secretary barim, ban wan shakhmat ban iehnoh ia ki kam pyntriem.
Kane ka jingkren jong u bah Prestone ka long halor ka jingkylli ia ka jingshah siat iap u bah Romeo Lyngdoh uba dei na shnong Lapalang, ka thain Pynursla dang shen ha ki dkhot ka HNLC.
“Ki dei ban wan sha khmat ban bud ia ka nuksa jong u GS barim ka HNLC, u bah Cheristerfield na ka bynta ka ri bad ka jylla’, la ong u bah Prestone.
U la ong ba ka long kaba sngewsih ia ka jingjia ba uwei u rangbah u la shah siat dang shen ha shnong Lapalang. “Ka long ka jingpaid dohnuh ia ki khun ki kti, kiba haiing hasem bad ki marjan marpa”, la ong u bah Prestone.
U la ong ba ka ain kan iaid shakhmat ban trei ia la ka kam bad hynrei na ka liang ka sorkar ka kyntu ba kin bud ia ka nuksa ka GS barim u bah Cheristerfield ban wan shakhmat bad ka jingkhang ka sorkar ka plié bad ka sorkar ka kwah ban iatreilang na ka bynta ka jaitbyntiew bad ka jylla.