Ka ILP bad ban pyllait ia ki 3 ngut, yn dawa ki 13 Seng Ha ka jingiakren 29tarik

Shillong,25 Iaiong:
Ki 13 sengbhalang ki la pynkhreh bha halor ki phang ba donkam ba kin ia kren ha ka 29 tarik u iaiong, ka sngi ba ka sorkar jylla ka la khot ia kren ia ki halor ki ain ban khanglad ia ka jingwan rung kyrthep ki bar jylla sha kane ka jylla.
Ki lad khubor ba u nongthohkhubor, u la ioh lum la iathuh ba mynta ka sngi ki 13 sengbhalang ki la pynlong ia ka jingialang ha Jaiaw, ban jied ia ki nongkren ki ban iatai ha katei ka sngi ha ka jigiakrren bad ka sorkar jylla. La ong ba ki la don haduh kumba saw ngut ki nongkren ki la jied ha katei ka sngi kynthup ia u bah Joe Marwein President ka FKJGP, bah Daniel Khy riem President KSU, u bah Sadon Blah General Secretary ka HNYF.La iathuh ruh ba nalor ki nongkren , la jied ruh katto katne ngut ki dkhot ki ban leit synran lang ia ki nongialam ha katei ka jingleit ia kren.
Lah ban pynkynmaw ba ki sengbhalang ki la dawa na ka sorkar ba kan khot ia kren noh ia ki la kham slem namarba ka mat ia kren ka dang sahteng, hynrei hadien ba ki la ap la katto katne taiew, ka sorkar ka la khot ia kren noh ha ka 29 tarik mynta u bnai. Lah ruh ban pynkynmaw ba hadien ba la ioh ki shithi khot ia kren na ka sorkar ki nongialam sengbhalang ki la pynpaw ba ka jingleit ia kren jong ki ha ka 29 tarik kan long beit ban pynbor ia ka sorkar ba kan pyntreikam beit da ka Inner Line Permit ha kane ka jylla , kum ka ain kaba lah ban pyrkhing ia ka jingwan tuid kyrthep ki bar jylla sha kane ka jylla.
Kham mynshuwa na ka liang ki sengbhalang ki la pynpaw ba ki dang pynkhreh ia ki mat dawa na ka sorkar ha katei ka jingiakren bad ki la pynpaw ruh ba ki la dep ban bishar ia kita ki ain bapher bapher kiba ka sorkar ka la ai haduh 52 tylli ba kin pule bniah. Hynrei mynta ka sngi la ioh jingtip ba ki 13 seng ki la dep pynkhreh ia baroh ki jingiakren kiba donkam ha ka 29 tarik.
Kham hadien la ioh jingtip ba ha katei ka jingialang, ki mat ba ki sengbhalang ki la buh hakhmat eh nalor ka ILP ka dei ka jingdawa ban pyllait noh ia ki lai ngut ki dkhot jong ki kiba la shah kem bad shah pynngat hapoh ka ain Meghalaya Prevention Detention Act (MDPA).