Da ka ia bein briew, ha ka kanbas MP

Ka elekshon 2019, sha Lok Sabbha, ka dei ka sobjek, kaba da ijli tasam haduh katta, namar ba ka dei ka elekshon, kaba ia bein ia tim, ia niew tang ia ka jinglong shimet jong u ne ka briew bad kaba niew tang ruh wat ia ki briew kiba la iap bad ki bym don bynta shuh satia ha ka ialeh elekshon.
U Rahul Gandhi, uba dei u nong ialam ba rangbahduh ka seng Congress, um don thylliej da kumwei pat, lait na kaba bein ba khoh ia U Narendra Modi bad ka jingkren bein, ka la poi ha ka khep, kaba sngew jli sohsat bad kam dei tang katta, U Modi ruh ula sangah ia U Rahul, ia ka iing jongu bad u thylliej jong kitei ki arngut, ka long beit ban bein Congress bad na kawei ka liang ban bein BJP.
Ka jingshisha, ka kham don ia U Rahul, ba un kynthah ia ka seng BJP lem bad ia u myntri rangbah duh, namar ba ki don ha ka sorkar, hynrei lada jia ba na ka liang jong u myntri rangbahduh, u iai bein iai khoh tang ia ka Congress, kata te ka bym lah long satia, hynrei, u dei ban pynshai sha ki paidbah, halor ka jingioh ne ka jingduh nong jong ka India, na ka jing pynduh pisa, ka jing pyntrei kam ia ka GST, nangta sa ka skhim nongrep, kaba la dep mang ha ka mang pisa ba dang shu dep bad nangta sa kiwei pat.
Hynrei lada shu kynnoh shi kynnoh tang ia ka Congress, da ki kyntien kiba ong ba ka dei ka seng kaba bam sap, ka seng kaba pynhiar ia ka ioh ka kot bad kumta ter ter, kam long kaba u paidlang ka India, un sngew tynnad, namar ba ka jingjied ia ka seng BJP, ba kan ialam ia ka sorkar ha u snem 2014, ka la dei ka syrnot kaba pyni, ba u paidlang u thmu ia kata, hynrei lada shu iakren shi iai iakren ia kajuh shi kajuh, kata ka kylla long noh ka kam biej.
Ka la dei ka por, ba ngin kylla noh ia ka rukom kanbas elekshon bad kata ka long ba ngin buh ia ki mat kiba thmu na bynta ka Ri hi baroh kawei, namar ka jingkren bein iano iano, kam don jing myntoi satia bad kam hap hi ruh ha ka mat treikam jong ka sorkar (hadien ka elekshon) bad ban ia kaba iakren ia ka kam jong u shimet, ka la bha ban ia tai ia ka Brexit, kumba long ha UK, lane ban tei kynroh sha mar pud bad ka Mexico, kumba long ka elekson ha Ri America. [rms]