Ap kaiphod ka sorkar na ki District ban thaw Block thymmai: Prestone

Shillong,25 Iaiong:
Ban pynsuk ia ki paidbah ka sorkar ka la don ka thong ban thaw ia ki C&RD Block kiba thymmai ha kylleng ki District ka jylla , ha kaba ia katei ka kam ym pat lah ban pynurlong, namar ba ka dang ap ia ki kaiphod na ki bor Pyniaid District, haba ia kren bad u Rupang ha kamra treikam jong u, u bah Prestone Tynsong u myntri ka tnad C&RD Block u la ong ba haduh mynta ka sorkar kam pat ioh ia ki kaiphod na ki bor pyniaid District, kiba ka sorkar ka la phah ban jurip, “Ngi dang ap ia ka kaiphod na ki bor

Pyniaid District, ngin thaw ia ki Block thymmai hadie ba la dep ban bishar bniah ia ki ripod” ong u bah Prestone Tynsong.
Haba la kylli hato haduh katno tylli ki Block ka sorkar ka buh thong ban thaw thymmai , u bah Prestone u la ong ba ym shym la buh thong , hynrei yn peit katkum ki jingdonkam ba la lap na ka ripod la kita ki jaka ki biang ne-em ia ki jingdonkam ba ka sorkar ka kwah. Haba la kylli ia kita ki jingdonkam u bah Tynsong u la ong ba hap ban peit ia ka jingbun briew jong ka jaka, ka jingjngai , ka jaka pdeng ( Head Quarter), ka jingheh ka jaka, la ki surok ki la biang bha ne-em bad haduh kumba katno ki nongioh jingmyntoi.
Lah ban pynkynmaw ba ka jylla ia mynta ka don haduh 39 tylli ki C&RD Block, katkum ka jingshim jingkhein ha ki 7 tylli kik District, kham mynshuwa ka la don tang 32 tylli hynrei la kyntiew biang sa 7 tylli ki district, bad ka la don ka jingkhmih lynti ba namar ba ka sorkar ka la pynkha District thymmai haduh saw tylli ka jingdon ki CRD Clock ruh kan kham nang kham kiew.