Kyrmen u kandidet CPI, ban poi shakhmat ha ka MP

Shillong, 25 Iaiong:
U kyrtong MP ka CPI u Bah Richard D Sha bong u la pynpaw ia ka jingsngew skhem ba un poi shakhmat ha kane ka elekshon MP. Wat la um lah ban iohi ia ki dohnud jong ki briew hynrei u la ong, “Ngam lah ban tip ia ki briew hynrei ngan ap ia ka result ha ka 16 tarik Jymmang, 2014”.
U la ong ba ka CPI hapoh ka jinglong nongia lam jongu, ka don lut ki jingiadei kylleng ki briew ba sah ha kane ka ri Khasi Jaintia, watla um shym la leit ban ialap elekshon ha man ki jaka.
U la ong ba u la ialeh ia kane ka elekshon khlem don pisa hynrei tang da ka bor jong ka jabieng bad ka jingtrei shitom. “Kiwei kiwei ki ia thied da ka bor jong ka pisa hynrei ngam shym la leh kumta, ngi pyndonkam da ka bor jong ka jingstad namar ba ka jingtip dei ka bor”, u la ong u Bah Shabong.
“Ki briew kiba rit baduk ki don bad kane ka seng lait noh ki heh spah namar ba ka nongrim jong kane ka seng ka long ban ieng pyrshah ia ka bor jong ki heh spah”, u la ong shuh shuh.
U la ong ba ha kane ka kynti, ka elekshon kan pher bha namar ba ki paidbah ki kwah ia ka jingkylla, bad ia kane, yn iohi ha ka sngi niew vote.
“Ngam ju shong thait ban trei ban ktah ban iarap ia ki briew wat hadien ba la kut ka elekshon ruh namar ba nga dei u briew ba khih ba ksar, u la ong u Bah Shabong uba la shong thait na ka kam Research Assistant na NEHU.
U la ong ba bun ki briew ki la kynnoh ba ka CPI ka dei kaba khlem ngeit ia u Blei hynrei kane ka dei ka bym shisha.
U Bah Shabong u dei uwei na ki 8 ngut ki kyrtong MP ba ialeh ha kane ka elekshon na Shillong Parliamentary constituency. Nalor u Bah Shabong, kiwei ki long u Bah Paul Lyngdoh na UDP, Bah Vincent H Pala na Congress, Bah Ameringtone Kharshiing na AAP, Shibun Lyngdoh na BJP, Denis Siangshai kyrtong shimet, Ivoryna Shylla kyrtong shimet bad u Pastor PBM Basaiawmoit kyrtong shimet ba la kyrshan ka HSPDP bad KHNAM.