Ka HNLC bad ka jingiap ki para ri

Ka Hynniewtrep National Liberation Council (HNLC), ka la kam trai ba ka pyniap ia uwei na ki trai shnong ka Lapalang, da kaba siat iap ia u, ha ka miet jong ka 12tarik Jymmang 2019 bad ka HNLC, ka phla ba U Bah Lyngdoh, ula dei uwei na ki nongshet kylla ia ka Jaitbynriew, lane ba u dei u nong syntiat jong ki pulit, uba buh ia ki nongsyntiat ha Ri Khasi bad wat sha Bangladesh ruh kumjuh.

Katei ka dei ka mat kaba la sei madan da katei ka seng kaikhlaw, hynrei ka mat, kaba ngi hap iakren hangne, ka long ba ki la don bun ki riew rangbah jong ka thain Riwar, kiba la duh ei ia ka jingim ba kordor jongki, ha kine ki bun phew snem ba la lait bad ki don na kitei kiba la kam trai da ka HNLC bad ki don ruh kiba ngim tip satia haduh ha kine ki sngi, mano ba la pyniap ia ki bad haba ka long kumne, ka shu sah kein, ha ka jing sahdum ba mano ba pyniap ia ki bad mano ba donkti lane na kaei ka daw?

Ban dkhat jubor ia kawei ka jingim briew, ka long ka jingleh kaba triem than ha ka jing ia tip lem ka doh ka snam khasi bad ngim tip, la kito kiba la pyniap ia U bah Romeo, ki lah ne em ban sait khuid ia la ki jong ki shympriah kti jongki bad lada ym dei ia utei u rangbah ruh, hynrei sa ia kiwei pat ki riew rangbah, kiba sha ka thain War Mihngi bad War Jaintia, kiba la ju shah kthong ha ka HNLC lane ha ki pulit bad kito lei kiba don pisa, ki ju shah pyndik man ka por.

Ka jingshisha ka long ba mynta ha kine ki 20snem tam eiei, ka la don ka jingiap ei jong kumba 5,6 ngut ki riew rangbah lane ki riew don burom ha ka thain bad kitei kiba iap, kim dei ki khar bylla, lane ki nongbylla sngi, hynrei ki dei ki nongkhaii, ki nongtrei kam lajong bad katei ka pyni, ba kitei ki dei kiba don daw bad ka jing ia siew ia tda lane ka kam dawa pisa jong ki seng kieng atiar.

Ha ki snem 90, la ju kynmaw, ba ki don ki briew kiba ka HNLC, ka ju rahbor ia ki bad lehse ka tian bishar, halor ki kam ialeh pyrshah jongki bad hadien ka sa pyllait noh, lane ka pyndeng tala bad ka siat na kti na kjat bad kumta ter ter, hynrei ha kine ki sngi, la iohi, kumba katei ka rai ban ai jingsneng lane ban ai jing maham, kumba kam trei kam shuh satia.