| Nongpoh: Ki heh jong ka sorkar jylla, kaba kynthup ia u Bah A.L Hek, Myntri ka koit ka khiah bad u Bah Hamlet Dohling, Myntri ki kam pynroi sor, mynta ka sngi ki la hiar jurip sha ka shnong New Balakhwa, ka shnong jong u Bah Micheal Warjri, Secretary ka Hima Nongspung bad uba la shah hiar thma dangshen ha ki paidbah jong katei ka thain.
Ha ka por ba kitei ki heh sorkar ki la hiar jurip, la synranlang da u MLA ka Jirang, u Bah Sosthenes Sohtun, nangta u MLA ka Nongstion u Bah Macmillan Byrsat, u Bah Renikton Lyngdoh Tongkhar, MLA ka Mawkyrwat, ki bor distrik ka Ri Bhoi lem bad kiwei kiwei. Haba kren sha ki lad pathai khubor, kitei ki heh ka sorkar jylla, ki la ong ba ka nongrim hi kaba la pynlong ia ki ba kin hiar jurip sha katei ka shnong, ka long ban lap bad ban iohi ia ki jingshisha halor ka jingjia pyrshah ia u Bah Micheal Warjri bad shibynta ban jurip iala u jong u pud u sam. “Haba ngi la iohi da la ki jong ki khmat, ngi sngewthuh ia ka jingeh kaba la iakynduh da ki paidbah kiba sah ha katei ka thain” pynpaw kitei ki heh ka sorkar jylla. Ki la ong ruh, ba kaei kaba ki lap ha katei ka jingleit jurip kaba mynta ka sngi, kin sa phah ia ka report sha u Conrad K Sangma, Myntri Rangbah ka sorkar jylla bad khamtam eh na ka bynta ban pynpoi ia shibun ki kam pynroi sha katei ka thain, khnang ba kito ki paidbah kiba sah ha katei ka thain, kin im ha ka suk ka sain. Halor ka Police Outpost, kaba la iakren da kiba bun, kitei ki heh ka sorkar jylla, ki la ong ba katei ka thain ka la donkam kyrkieh ban don noh kawei ka Police Outpost, namar lyngba ka Police Outpost ka iada na kino kino ki kynrum kynram bad kan wanrah ia ka shongsuk shongsain bad ha kajuh ruh ka por ka jingdon ka Police Outpost kan long ruh kum u paia uba khlain na ka bynta na ka jingkyntur pud ka Assam. |
Phi don ban ong eiei?