Jam ka Kharumnuid FC sha ka Final ha Sohryngkham

Shillong:Ka kynhun ialehkai phutbol ka Kharumnuid FC ka la pynliem ia ka Laitlum FC ha ka semi-final ka ba nyngkong bad pyntikna ialade ban jam sha ka phainal jong ka IInd Mawutieng Invitation Football Tournament ba la pyniaid da ka Mawutieng Sports and Cultural Club ha madan Thohlyndit, Sohryngkham.

Ha ka jingialehkai ba lah pynlong ha ka sngi saitjain, ka jingialehkai hapdeng kitei ki ar tylli ki kynhun kala long shisha kaba shongshit bha wat la baroh arliang ki players ki la lah ban pyni ia la ki jong ki sap ban iohrah ia ka thong. Ka Kharumnuid FC ka lah ioh ia ka lad ka kabu ban pynkhih jar nyngkong da u Nibin Kharumnuid ha ka 7 minit. Hapdeng ka jingkynhoi bad pynshit pynshngain ki paidbah, ki rang ialehkai jong baroh ar liang ki la ialehkai bha tyngeh ban ioh thep kol beit hynrei kim shym lah satia bad sa shisien ka Kharumnuid FC ka la iohlad ban thep biang sa ar kol da u Ribok Kharumnuid ha ka 35 bad 42 minit. Tad haduh ba kut ka kylla step jong ka jingialehkai, ka Kharumnuid FC ka lah ioh ban tam da 3-0 kol. Haba wanphai ha ka kylla miet, ka sur ialehkai na ka Laitlum FC ka la pyrshang tyngeh ban ioh pynphai kol bad ka jingialehkai ka la nang kham itynnad shuh shuh. Hapdeng kane ka sur kaba mar biang bor bha, ka Laitlum FC ka lah nion tyngeh bad ioh ban pynkhih jar ban thep shi kol da u Pyntngenlang ha ka ba 52 minit. Da ka jinglah ban pynphai shi kol, ki players jong ka Laitlum FC ki lah pyrshang tyngeh bad ialehkai bha ryngkat ki kabu ban ioh pynphai ia ki kol hynrei na ka jingtbit jong u nongap kol ka Kharumnuid FC uba lah shan tyngeh bad kyrda ba kin nym lah ban pynkhih jar. Ki players ka Laitlum FC ki lah sei la ki sap ki talent bad pyrshang ban iohthep kol biang hynrei ym shym lah ban pynurlong bad ha kaba kut ka Kharumnuid FC ka la pynliem da 3-1 kol ia ka Laitlum FC bad rung sha ka phainal jong kane ka tournament.
Na ka liang ka synjuk ka pyntip ba kan pynialehkai ia ka 2nd Semi-final (ba la pynkynriah tarik na ka daw jong ka eriong Fani) ha ka 18th Jymmang, 2019. Ha kane ka sngi ka King XI (Smit) kan iakhun pyrshah ia ka Young Star FC (Shillong) ha ka por 2.00 baje janmiet. Ka synjuk ka khot ka wer ia baroh ki riew ieit phutbol ban ia wan ban sakhi da la ki jong ki khmat ia kine ki jingialehkai. Ka bai rung na ka bynta ki nongpeitkai ka long tang 30 tyngka marwei.