Ha ka jing ia tai ba 3 kynta, beh seng ka HSPDP, ia kong Fenella

Shillong, 24 Iaiong:
Kumba 3 kynta eiei ka la shim por ia ka CEC ka HSPDP ban shim ia ka rai beh seng ia ka kong Fenela L Nonglait, ha ka jingialang jong ka kaba la long mynta ka sngi ha Sankardev Hall, kaba don ha Bishnupur.
Ha katei ka jingia lang la don ki khlieh nongialam ka HSPDP kaba kynthup ia u President Rangbah katei ka seng u bah Hopingstone Lyngdoh, u Vice President bah Ardent Basaiawmoit, u bah Witting Mawsor, bah L.G Nongsiej, u bah Pyniaid Syiem, kong Grace Kharpuri, kong Teilinia Thangkhiew bad kiwei pat ki nongialam ka HSPDP.
Tang mar iawai ka jingialang u Rupang u la ioh ban ia kren bad uwei na ki nongialam katei ka seng u bah Witting Mawsor ha kaba ha kaba u la ong ba baroh ki dkhot ka party kiba la poi sha ka jingialang ki la mynjur ban shim da kawei ka rai ban beh seng shisyndon ia ka kong Fenela. Haba la kylli kaei ka daw kaba la pynlong ia ka jingialang ban slem haduh kumba lai kynta tam ioh lehse ka don kano kano ka jingpyrshah halor katei ka rai beh seng, ‘baroh ki la mynjur ban beh seng’ ong u bah Witting, haba la kylli pat kiei ki jingpynshai ba ka HSPDP ka la ioh na ka kong Fenela, u bah Witting u la ong ‘ngim donkam shuh ban pan jingpynshai namar ba ki Live Telecast, ki kot khubor ki la long ki sakhi bah na bynta ka jingpyrshah seng ka kong Fenela’.
Kham hadien haba kren sha ki nongthohkhubor ha Shillong Press Club u bah Witting Mawsor, u la ong ba ha ka seng HSPDP kam ju don kyndon ban beh seng da kaba buh por -hynrei wei la beh la beh, kaba mut shisyndon. U la ong ruh ba ka jingslem ka jingialang ka dei namarba ka ju dei hi ka rukom ha kano kano ka party shuwa ban shim ia ka rai hap ban don ki jingiatai kiba bniah. Haba la kylli kumno ka HSPDP kan leh lada jia ba ka kong Fenela kan wan pan map halor katei ka jingkynnoh pyrshah seng, u bah Witting u la ong ‘ka por kan sa batai’.
Halor katei ka phang, u Rupang u la wad jingtip kumno ka jingialang ka HSPDP ha Sankardev Hall ka iaid, la ioh jingtip ba ha katei ka jingialang u bah Hoping President Rangbah u la pyrshah ia katei ka jingbeh seng ia ka kong Fenela bad u la ong ba kam don ka kyndon ain hapoh ka Constitution ka seng ban beh seng, la iathuh ba ha katei ka por ka la don ka jingiakhyllie kot khyllie sla ban peit ia kita ki ain ka Constitution jong ka seng, hynrei la iathuh ba kham hadien u bah Hoping u la pynkohnguh noh ialade ha khmat kiba bun. Haba ai jingpynshai halor kumno u bah Hoping u sngew halor ka jingbeh seng ia ka kong Fenela u bah Witting u la kam ba u bah Hoping u ong ‘kaei kaba ki paidbah ki hun , nga ruh nga hun ka HSPDP kam dei ka seng jong nga marwei’.