Yn shong kyllain myngor ka FKJGP, ban pyrshah ia ka jingjia ha Balakhwa

Nongpoh: Ban pynpaw ia ka jingsngewkhia bad sngewbitar halor ka jinglehmynthi ka sorkar jylla halor ka jingjia pyrshah ia u Bah Micheal Warjri ha shnong New Balakhwa, na ka liang ka FKJGP North Khasi hills, kan sa pynlong ia ka jingiashong kyllain myngngor ha MUDA Nongpoh kum ka dak jong ka jingsdang ka jingiakhih halor katei ka jingjia.
Haba phah iaka kyrwoh na ka liang u Secretary ka FKJGP NKHD, Bah Luistar Lyngdoh u la ong ba kum ka seng ka dap da ka jingsngewkhia bad sngewbitar ba ka sorkar haduh kine ki sngi ka dang sngap mynthi bad khlem ai jubab eiei halor katei ka jingjia kaba heh kaba dei tang naka daw ka jingkajia pud ba ki arliang sorkar haduh mynta kim pat lah ban pynbeit ia u pud u sam.
Ia katei ka jingshong kyllain mongor yn pynlong ha ka 14 tarik naduh ka por 9 baje mynstep haduh ka por 4 baje janmiet hakhmat jong ka MUDA Complex kaba don ha Nongpoh kum ka sienjam baa nyngkong ba ka seng kala shim da ka jingiakhih ba jai jai bad lada ka sorkar kam ai jubab eiei naka liang ka seng kala pynkhreh da ki jingiakhih kiba kham tyngeh.
Naka liang ka seng kala khot bad wer ia baroh ki president bad Secretary jong ki unit bad Circle bapher bapher, kumjuh ki nongialam jong ka North Khasi Hills District ha Ri-Bhoi ba kin ia mih paidbah ha katei ka sngi naduh ka por 9 baje mynstep ha MUDA Complex.