T.50 klur tam, ym pat pyntreikam ia ka pisa ba lum na ka Lafarge

Shillong,24 Iaiong:
U Myntri ka tnad kam khlaw ka jylla u bah Prestone Tynsong mynta ka sngi u la khot jingialang ia ka Special Purpose Vehicle (SPV) ka komiti ba la khlieh da u Chief Secretary ka jylla, kaba long ruh ka komiti kaba dei peit ia ka rukom pyntreikam ia ka pisa kaba ka sorkar ka ioh lum na ka Lafarge Company. Haba ia kren bad u Rupang ha kamra treikam jong u , u bah Tynsong u la ong ba u la ioh jingtip ba baroh ka pisa ba ka SPV ka la ioh lum na ka Lafarge ka kot sha ka T.84.50 klur tyngka (84 klur shiteng) hynrei haduh mynta la pyndonkam tang kumba T.30 klur tam , bad ka pisa ka bym pat pyn donkam ka long haduh T.54.50 klur tyngka. U bah Prestone u la ong ba ka sorkar ka la don ka jingiakut ( Royalty) bad ka Lafarge ba kan siew T.90 tyngka shi Metric Ton, bad haba ia khein ha ka shi snem ka pisa ka poi T.18 klur tyngka.
U bah Prestone u la ong ba katei ka pisa ba la ioh lum na ka Lafarge ka dei ban ai jingmyntoi na ka bynta ki 52 tylli ki shnong kiba hap hapoh ka thain ba ka don ka Lafarge Company, (kaba don ha Nongtrai). Ki jingmyntoi ba kitei ki shnong kin ioh na ka pisa ba la lum na ka Lafarge ka long ha ki kam pynroi ha ka imlang ka sahlang , kum ki surok, ki lynti iaid kjat bad kiwei, ka dei ruh kaba lah ban pyntreikam na ka bynta ban kyntiew ia ka ioh ka kot kito ki shnong kum ka jingai baibam ia ki khynnah pule ka thain bad kiwei.
Ha ka jingiakren bad u bah Prestone la sngewthuh ba haduh mynta ka SPV kam pat lah ban pyntreikam lut ia ka pisa kaba la ioh lum na ka Lafarge, kumta u la khot ia ka tei

ka jingialang kaba la long mynta ka sngi ban phah pynkloi noh ia katei ka kam khnang ba ki paidbah kitei ki 52 shnong kin ioh ia ki jingmyntoi ba ki don ka hok ban ioh. U la pynkynmaw ruh ba hadien ba la thaw ia ka SPV, ka SPV pat ka la thaw ia ka implementation Society ka ban peit ia ka rukom pyniaid ia ka pisa khang ba ka rukom pyntreikam kan long beit na ka bynta ka jingmyntoi u paidbah.