Shillong: Halor ka jing shah thombor jong u Secretary jong ka Hima Nongspung,U Bah Michael Warjri, myn hynnin ka sngi U Rupang, u la ioh ban iakren bad ki khun jong u bad la iathuh ba ha ka sngi Hatmajai kaba dei 7 tarik Jymmang, 2019, shi kynhun ki briew bym dei khasi jong kito ki shnong ba marjan jong ka Balakhawa,na Bernongsai bad na wei,kiba don kumba 300 ngut eiei, ki la wan ryngkat bad ki maw ha ka por 1baje nohsngi bad ki la kawang maw beit beit ia U Bah Michael haduh ba un da thiah lyngktar ha madan bad ki da kyrdem ruh da ki kjat. Ha katei ka por, U Bah Michaei, u don ha iing tang bad kawei ka khynnah nongtrei.
Ka iing kaba la julor jhor, ha ka jinghiar thma u paidbhur ha ka Sngi Hat Majai. La iohi ha ka dur ia ka kong Borlin Rani, hajan jong ka iing kaba la shah pynjot jong u Bah Michael:Rupang
Hadien kata ki la teh ia u ryngkat bad ka suloi ha ka met jong u bad ialam sha jrong ka jingkieng ban pynhap ha poh um.Donbok ba la kloi ba poi noh ki pulit ka Assam bad la knieh noh ia u bad la ialam noh ia u sha Thanad jong ka Palasbari, jong ka Assam.Hynrei,naduh mynnin ka 9 tarik Jymmang,ki la rah noh ia U Bah Warjri sha Central Jail ha Lakhra jong ka Jylla Assam ban ioh ia ka jingsumar ba kham bha.
La iathuh da ka khun jong une u lanot, ka kong Badarilin Rani, ba u kpa jonki, um da don ha ka met ba shait artad ha ka met jinglong tymmen ba la 78 snem. Ka la kren da kaba bynniaw eh ba kam lah ban peit ba kat ha kane ka arta un shong ha phatok,ha kaba ka bam ka dih ka thiah ka dem ruh kam biang satia bad katei kan nang ktah shuh shuh nalor ki jingpang na kaba shah shoh shah bom.La ia thuh ba ka jingshitom ba kham jur eh dei na ki bynta ka khlieh,ki kti ki la jngem.
Haba la kylli ka ei ka daw ba la pynlong kumta, ka la iathuh ba ka daw ba ha khmat eh dei ka jingpyrshah jong u ia ka jing wan shna ia ka surok da ka sorkar Assam.Namar ia kane u la dep buh dorkhas wat ha ki bor ba halor ka Sorkar, namar um kwah ban duh noh iaki jaka sha Assam.
La iathuh ba ha ka por ba poi ki pulit na Meghalaya,namar ki poi haduh ka por 4 baje janmiet da ka jingpyntip jong ka khun jong u,u Bah Michael lem bad ki pulit Assam ruh kim don shuh.Hynrei ki paitbhur ba la bitar bha ki dang don hangtei ha ka jaka ba don ka ing,namar ba ki la wiang ding noh iaka iing ryngkat ki tiar kitar,ki kot ki sla bad ki la khet pyn kyllon ruh ia ki dieng soh,dieng kwai.
Ha ba la kylli pat,la ki sngew kumno ba U syiem bad ki dkhot jong u ki dang poi mynta ka sngi haba la jia naduh 7 tarik Jymmang. I la bynniaw ,”Ngan sngew kumno wat lada sngew ruh haba ki ong ba slem ba ioh jingtip”.Shuh shuh,ha ba kylli la kin dang sngew nud mo ban sah haka tei ka jaka,I la ong “Ka iing lajong ngan ymphet, ai kita ki ba bishni kein kin phet”.
Haba u nongthoh khubor u la ioh ban iakren bad ki riew paitbah na ka tei ka jaka,ki la iathuh ba ka shnong New Balakhawa ka don 6 iing, katkum ka jingtip jong ki, namar ka dang ioh na ka Balakhawa bad ka iing Khasi ka don tang jong u Bah Michael marwei.
Haba la kylli, kumno ki poi shongshnong da kiwei ki jaitbynriew ha kine ki shnong,la iathuh ba katkum ki kot ba la ioh ka long ha u snem 1965 u syiem u la pynbna ia kane ka thain kum ka Raid Umsohbar-warmawsaw.Bad kine ki dkhar ki ba la shong lypa ha kane ka jaka ki hun beit ban nguh syiem ha ka hima Nongspung bad ki ju siew tang ka bai musur sha ka Hima man ka snem.
Shuh shuh,ki paitbah jong ka tei ka thain ki ong ba ka daw kam dei tang ba u pyrshah ban shna ia ka surok ,hynrei ki don ki daw shimet ruh ki ba la pynlong ia ki paitbah ban khie bitar.
Phi don ban ong eiei?