Ka jingpynlip ding kan nang bteng ba dang bun ka ram ha ka NEEPCO: James

Shillong: U Myntri ka tnad bording ka jylla, u James K Sangma u la ong ba ka jingpynlip ding ha ka jylla, kan iaid bteng namar ba ka dang don ka ram kaba jur bha ha ka NEEPCO.
Haba kren myn hynnin ka sngi sha ki lad pathai khubor, u James u la ong, “Ka jingpynlip ding ka dang bteng namar ba ka NEEPCO ka dang buh kyndon ia ka jingsam ding namar ba sah ka ram kumba 600 klur bad ka sorkar jylla ruh ka shem jingeh namar ba ka hiran pisa”.
U James u la ong ba ka jingpyrkhing ka NEEPCO ka la pyllong ia ka sorkar ban pyntreikam ia ka jingpynlip ding watla ka sngewthuh ba ka long ka jingeh ia ki paidbah.
Haba pynpaw ba kane kam dei ka jingeh kaba dang mynta, u myntri u la ong ba kane ka ram ka dei kaba sah naduh ka por mynshwa bad kane ka sorkar ka la iakynduh jingeh namar ba ka jingpynmih khajna ka MeECL kam kot bor ban siew ia ka ram.
“Kyrmen ba ngin lah ban pynbeit ia kane ban pynduna ia ka jinglip ding. Ka donkam ban thaw lad ban weng ia kane ka jingeh”, u la ong.
U kyntait ruh ba ka sorkar ka leh shiliang bam bording sha nongkyndong bad leh kham sbun sha sor. “La sam bording katkum ka jingdon ki nongshong shnong. Hooid, ka jingpyndonkam ia ka bording ruh ka kham jur sha sor bad duna sha nongkyndong”, u la ong.
U la ong ba ka jingpynlip ding ka jia bun sien shi sngi namar ba hap ban moramot ia ki jingsniew, hap ban moramot man ka por bad kane ka la pyllong ban pynlip ding khah khah khamtam sha nongkyndong.
Ha kawei ka liang, halor ka jingpyrshah ki paidbah ka Mawkyrwat ban lum bai thang ding ka kompeni FEDCO, u James u la ong ba ka jingaiti ban pyniaid da ka rukom ka Franchisee ka dei kaba bha hynrei ki paidbah ha katei ka thain, kim pat sngewthuh ia kane.
“Ngin pyrshang ban pynsngewthuh ia ki bad ki dei ban pdiang ia ka namar ba ka jingaiti ha ka kompeni kam dei tang ban shu lum pisa bai thang ding hynrei ban shna ban moramot haba don ka jingthut, ka jingsniew, ban thew ia ka jingpyndonkam ding ki briew ha ki shnongbad kiwei ki jingdonkam. Haba kren lyngkot ka long kum ka jingaiti ban sam bording”, u la ong.