Mynjur ka Supreme Court ban pyllait dewiong biang sa 15 sngi ha Meghalaya

Shillong:Ka Supreme Court mynta ka sngi, ka la shah ban die noh ia u dewiong, uba don 76 hajar ton, haduh ka 31tarik Jymmang 2019.

Katei ka rai jong ka kashari, ka long ban pyniaid na ka bynta 15 sngi kynthih ia katei ka mar, kaba ka kashari, ka la khang noh kynsan, ha ka 15tarik Nohprah 2018, wat la ka la ai rai kham mynshwa, ban ai por ban die haduh ha ka 30tarik Nohprah 2018.

La iathuh ba ki shalan, na bynta ban die ia katei ka mar kaba 76hajar ton, ka don mynta ha ophis jong ka tnat mar poh khyndew jong ka sorkar Jylla bad mynta ki trai par kin hap ban leit shim noh ia kitei ki challan bad ban pyniaid noh ia katei ka mar kaba la dep ai jingkhein sha ka kashari.

Ym tang katta, la rai ruh ban pyn thymmai ia ka challan kaba 18hajar ton u dewiong, kaba la dep ai sha ki nongkhaii, hynrei kaba la kut por noh, na ka daw jong katei ka jingkhang kynsan jong ka kashari, ha ka 15tarik Nohprah 2018.

Ka Supreme Court, kam shym la iakren mynta ka sngi, halor ka 38lak ton, kaba ka sorkar Jylla, ka ai jingkhein halor ka jingdon u dewiong, uba don ha ki par ha kylleng ka Jylla bad la sngewthuh ba ia katei ka kam, yn rai syndon da ka Supreme Court, ha kaba kan pynkut syndon ruh ia katei ka kam khang dewiong ha U Naitung 2019.