Na ka liang jongnga kum u nongtreimon sngewbha hapdeng ka Jaidbynriew Hyññiew Trep Hyññiew Skum kaba ngi ju tip kum ka Ri Khasi baieid ki Blei, nga pynrem jur ia ka Seng FKJGP kaba byrngem byrsit ianga haduh ban pynpaw ba ym ithuh ia nga da kaba ong ba nga kam ialade kum u briew jong ka FKJGP. Balei kamdon shuh mo ka jingniewkor ia ki dkhot kiba rim.
Nga kwah ban pynpaw ba ha ki por ba la leitnoh ngam lah ban len bad nga dei shisha u dkhot jong ka FKJGP ha kaba nga la bat kum u President jong ka FKJGP Mawsynram Circle. Hato lada ki briew ki kylli ianga mynta ba “La ju trei ne em ha kano kano ka Sengbhalang hapoh ka Jylla?”. Hato nga lah mo ban shu len ne wat ban ong “Em ngam pat ju trei ha kano kano ka Seng ne wat ban shu kam ialade ba nga don ha kata ka seng FKJGP”.
Nga sngewthuh shai kdar mynta ba baroh na kine kidei tang ki jingpyrshang ban pynsngap jar tang namar ba kidon ka jingmyntoi ialade khlem da pyrkhat shuh ia u paidbah bapli uba donkam ia ngi kum ki nongtrei mon sngewbha hapoh ka Jylla.
U Elton Cliff Warjri, u ba kam ialade kum u Asst. General Secretary, FKJGP Central Body mynno u la ju mih paw ban shakri da lade ia ki paidbah hapoh Jylla?. Kane baroh ka pawshai ba kadon kaei kaei ka jingmyntoi na sha lyndet hapdeng jong ki ha kaba iadei bad ka jingdawa jongnga ban weng ia ka Kong Aiom Ksiar Diengdoh naka shuki Principal jong ka skul Pinemount. Hato u nud mo ban mih marwei katta ki issue kiba nga la ju iaid naduh kip or ba la dep ha kiba bun tylli ki lynti.
Hato la ka FKJGP kam donkam shuh ne ia ki briew kiba treihok ban shakri na bynta u paidbah hapoh ka Jylla?. Ka jingbyrngem jong ka FKJGP ianga ban leh da kaba tyngeh ba lada lap ba nga kam ialade kum u dkhot jong ka seng kadei tang nakadaw ba kadon ka jingkhwan myntoi shimet bad wat haduh khlem da donkam shuh ban pynpaw ruh ba nga dei u dkhot barim jong katei ka seng.
Ka FKJGP kam don shuh ka jing sngewnguh ia ki dkhot barim wat haba ki la aiti ialade ban shakri bad noh synniang lyngba ka seng ha kipor kiba la leitnoh. Hato ban byrngem ianga kumtei ka mut kumno?. Hato nga dei mo u runar uba la leh kam sniew hapoh ka imlang sahlang ne uba la pynjah burom ia ka Seng?
Balei kita ki nongialam kim kwah shuh mo ban bishar bniah ne wat ban iakren markhmat la kalong ne em kaba shisha, shu kynsan haduh ban shu ai beit tdam da kaba tyngeh hapoh ki kotkhubor tang ban shu thad khlemraiñ ia u briew khlem da don ki nongrim kiba biang. Kaei kane ka jingmut kaba ki la leh?. Lada kidei ki briew kiba don jabieng ban pyrkhat kila dei ban da puson hashuwa ban shim ia kano ka rai haduh wat ba ki khlem da bishar ruh ia khubor kiba nga ai jingkren lyngba ka Batesi News ne T7 ruh kumjuh.
Balei kum ki nongialam ki pynkylla nonglilam pynban ialade kumne, hato balei kim bishar bniah ia kiwei pat ki issue kiba la mih hashuwa ha kaba iadei bad ka skul Pinemount. Lada ymdei ba kidon kum kitei ki briew hapoh ka seng FKJGP ngam tharai ba wat na kaliang jongnga ruh ngan shu mih khlem da don ki daw kiba biang.
Kitei baroh ki pawshai ba ki dei tang ki khwan myntoi shimet khlem da kwah ban puson na bynta ka bha ka miat. Ka jingkren bieit bad jingleh khyllung khynnah jong kitei ki nongialam kan sa pynjah khlep shisien ka sngi ia ka kyrteng jong ka seng FKJGP. Mynta ka paw shai ba ki nongialam jong katei ka seng FKJGP ki don tang namar ban kamai spah bad ki la kylla long ki briew kiba kwah ban shim tang ia ki issue kiba don jingmyntoi na bynta ka pla tyngka jongki shimet. “Kaei ka jingmut ban shu kam ba ki trei na bynta ka Ri bad ka jaidbynriew katba ki la iehnoh shadien ia u paidbah”.
Ki paidbah ba bun baroh ki ai ia ka jingkyrshan kaba pura halor ka mat jingdawa jongnga namar ki tip shai ba hapoh jongkatei ka skul kidon bun kiei kiei kiba la pynbakla ia ka lynti baroh shi kata kipor katkum ka hok bad ka jingshisha. Mano ba la ju nud ban kren pyrshah naduh nyngkong ki sngi. Haba nga kren bad ban pynpaw ia ki jingshisha don bun bah ki lynti ki ba khohruh khohram ne wat ki nongwoh kjat na sha lyndet. Ko!! Phi ki paidbah wat leitduh mynsiem halor kane ka bynta bad kum u briew uba pyrshang ban trei bad aiti ialade ha la kajong ka Ri ngan iai don ha syndah jongphi bad kat kaei kaba nga lah ngan iai pyrshang khlem da kynran dien tang namar ba don ki nongpynthut iwei bad arngut.
Ka FKJGP kam donkam shuh ban lum ia u paidbah mynta nangne sha khmat la da ka shim ia kino kino ki issue bad nakaliang jongngi ruh kum ki riew paidbah ngimdei ban ai ka jingkyrshan namar sngewthuh shai mynta, ba lada ymdei ba don kum kitei ki briew hapoh katei ka seng nga ngeit skhem ba ka kyrteng jong ka sengbhalang kan ym jah burom lano lano ruh bad ba ka Ri bad ka Jaidbynriew jongngi kan ymlong kumba long mynta ha kine ki sngi kumba ngi iohi da la kijong ki khmat. Ngi dei ban sngewthuh shai ia ka kyntien kaba ong “U Paia ba skhem un ym lah ban kyllon lyndang ne wat ban ieng tang hapdeng ka dewbilat bad u nar, lymda ym dei ban ioh ia ka khyndew kaba khlaiñ” Sngewthuh bad puson bha ia kata.
Banshai Marbaniang.
Nga kwah number phone Bah Banshai