|
Iaka “Ktien Khasi”, la tip bala shim naka tynrai kaba ki khot ka “Ktien Sohra”.Bad kane ka ktien la jer ruh iaka “Ka Ktien Thoh Bad Pule” haka jaidbynriew U Khasi khara ba la khot ieid “U Hynniewtrep Hynniewskum”.La pynrung iaka haki skul naduh ki kyrdan primary bad shaduh ki kyrdan ba kham hajrong ruh.
Hakane ka juk ba ngi im mynta kum ka jaidbynriew khasi, ka don ka Jingsngewbynniaw na uba bun balang,halor ka rukom pyndonkam iaka hapdeng ki briew jongngi hi. Watla ka don ka Jingialeh kumba ngi iohi,kaba wan na ki riewshemphang ban pynneh pynsah iaka ktien khasi, da kaba dawa naka Sorkar jylla bad India ban pynrung noh iaka haka khyrnit kaba phra (8th Schedule) jongka Riti Synshar ri.Hynrei ngi dang iai sakhi sah ba, Kane ka kam ka shu long noh tang kum ka “Official issue”,Katba kiba pynmlien bad kheinkor iaka hapdeng ki jongngi ka dang jlan palat ba kan ioh ban longdoh longsnam ha ngi iwei pa iwei. Haka jaidbynriew khasi, ngi shem ba ka don ka jingsngew haba pyndonkam iaka ktien khasi. Khyndiat lada tyrko, iaka jinglong jingim jongngi ki Khasi, ka long kaba sngew lehrain wat tang ban pynpaw pyrthei ruh.Hynrei ym banse, wei haba ka kam ka shah. Haba ngi peit bniah iakane ka jaidbynriew jongngi, ngi lah ban shem ba ka jingtynneng iaka jong kiwei ka kham ioh jaka haki jingmut jingpyrkhat jongngi.Khamtam hapdeng ki samla jongngi, teng teng la shem ba lada ki pyndonkam iaka ktien khasi haka thoh bad kren, ka i lam kumba ka pynhiardor iaka kyrdan longbriew manbriew jongki. Kane ka jingsngew la i kumba, kito kiba kren khasi la khein bad niew iaki ba ki dei ki ba “Dangbiej” ne ki bym pat biang ka kyrdan pule. Bad ka don ka jinghiengkhmut hapdeng kito kiba lah ban pyndomkam daka ktien “English” haka thoh, ka kren ka khana, namar ki sngew ba ki la ioh lypa iaka kyrdan kum ki briew kiba “La nang la stad ” bad kum ki riewshai ki riew nang. Kane ka jingsngew, ka wanrah iaka “Jah burom jongka ktien khasi”. Phin lap shibun ki bynta, watla dei u khasi ba pynlong ne shna iakano kano ka program ruh, barabor, kim ju bynrap lang iaka ktien khasi hakino kino ki jingpynbna, hynrei ki Shim bad tynruh beit daka ktien Nongwei, kumba ka pyn paw shaka pyrthei ba ki jaka jongngi bad ka jaid bynriew jongngi, ka dei ka tynrai jongka ktien “English” bad tyngkhat, phin lap ba ki pynbna kyrpang daka ktien khasi. Ym lah ban tip bad sngewthuh balei ka “Ka Burom Jongka Ktien Khasi” La buhrieh khop iaka hapdeng ka jingsngew briew. Haba ianujor bad kiwei pat ki jaidbynriew, ngi shem ba ngi hiar ka kyrdan haba niewkor iala ka jong ka ktien. Kiwei pat ki jaidbynriew, Ki shlan bad ki tur beit shaphrang, watlada ki Shah niewpoh ialade haba pyndonkam iaka “Ktien lajong”. Ka dei kane ka jinglong kaba pynpaw sha ka pyrthei, haduh katno ngi Ieid bad niewkor iala ka Jaidbynriew. Hooid,ym ba pynrem jur haba ngi pyndonkam daka ktien English, hakino kino ki bynta.Hooid,ngi tip ba Ka jylla Jongngi ka ia khleh bun ki jaidbynriew. Hynrei kaba sngewdonkam ban ong ka long, khamtam hakino kino ki jingpynbna paidbah, “Balei Ym wanrah iaka Burom ka Ktien Khasi ba kan Shynna shaka pyrthei “??? Lada kumne ngin iailong sah, khlem da pynmlien ban pyndonkam tikna iaka Ktien khasi hakino kino ki bynta, Kan shu long sepei Ka Jingdawa naka sorkar ban ithuh iaka Ktien khasi. Bad ka Shu long noh Kumba dawa naka Sorkar ban pynrung iaka kum kawei ka Ktien,ha Kper buh Jingkynmaw (Museum). Khublei Shibun |
Phi don ban ong eiei?