Ba khang tih dewiong, byrngem rah suloi ki nongniah trok

Shillong, 23 Iaiong:
Ka jingpynmih hu kum jong ka National Green Tribunal (NGT) ha ka 17 tarik mynta u bnai ha kaba la khang syndon shipor ia ka jingtih dew iong ha baroh kawei ka Meghalaya bad kumjuh ruh ban shalan shabar, tad haduh ban da pynmih da ka hukum kaba thymmai, ka la pynbitar shikatdei eh ia ki nongniah trok, ki nongbylla bad kumjuh ruh ia ki malik dewiong ha ka Jylla baroh kawei.
Haba u nongthoh khubor u la ioh ban iakren bad ki katto katne ki nongniah trok kiba dang ieng jahthait ha ka surok bah Bye Pass hajan umiam, ki la pynpaw ia ka jingbitar halor kane ka hukum bad ki la ong ruh ba kane ka jingpynmih hukum ka long kumba pyrshangban knieh noh ia ka pliangja jongki namar dei tang kane ka kam kaba ai jingmih na ka bynta jongki bad kumjuh ruh ban pynbiang ia ka iing ka sem.
“Lada ym shah shuh ban trei dewiong bad lada ngim ioh lad shuh ban kit dewiong, daei pat ngin kit lane kamai bad

lada ka long kumne ngim banse ban rah suloi noh namar dei tang kane ka kam kaba ngi im ja” la ong ki nongniah trok kit dewiong haba kren ha u nongaikhubor mynta ka sngi.
Ki la ong ruh ba, lada kin leit rep ruh kim nang shuh ban rep bad ka rep ruh kam lon satia kaba lah ban pynioh jakpoh khamtam lei lei haba ki la mylien ha ka kam niah kali bad kumjuh ruh ki nongbud ki pynpaw ba ki la myllien ha kane ka kam bad ka long kaba eh ia ki ban sdang biang ia ka kam rep bad ka lad kaba ki lahban leh ka long tang ban rah suloi ki la bynrap.
Lah ban pynkynmaw hangne ba ka National Green Tribunal (NGT) ka la pynmih ia katei ka hukum hadien ba ka la dep ban bishar bniah ia jingmudui jong ka All Dimasa Students’ Union bad ka Dima Hazao District Committee halor ka jingthurmur jong ka rukom tih dewiong ha Jaiñtia Hills kaba la ktah jur ia ki paidbah namar ka jingkylla bih lut ka um bam umdih bad ka NGT ka la bthah ruh u Chief Secretary ka Jylla bad u Director General of Police ( DGP) ban pynthikna ba ka jingtih dewiong da la lynti kaba beaiñ kaba ia syriem ia ki thliew khnai dei ban pynsangeh noh mardor ha baroh kawei ka Jylla.