“Don ki nongknia kiba ioh bor na u Blei, don pat kiba shu kamai pisa”

Shillong, 23 Iaiong:
Ka khan ka khein ka knia ka khriam ka dei ka niam ka rukom ki Khasi , kiba dang bat ia ka niam tynrai, bad haba pang ba shitom ki paidbah ba dang bat niam Khasi ki ju leit sha ki nongkhan ban phah duwai bad phah knia ba kin ioh koit na ki jingpang ba ban ha ka met jong ki. Ka jingngeit jong ki ka long kaba skhem bha ia kaei ka rai ba u nongkhan u batai bad u pynmih hadien ba la dep knia bad ki bud ruh ia ki jingbatai jong u kumno ban leh ia ki kam ba shakhmat. Hapdeng kat katei ka jingngeit kaba long ka kam bah kamsan, mynta ka la mih ka jingartaiten ha pdeng u paidbah sha phang ki nongknia, bad kane ka dei hadien ba la paw na ki jingjia kiba la jia i uwei u rangbah na ka shnong Tangmang u bah Mit Mawkon , ha kaba lai ngut ki nongknia ki la rai ba utei u rangbah u la iap. Ka kmie u bah Mit ka kong Phrrin Mawkon 80 snem tam ka la iathuh ba haba don kiba la wan iathuh ba u khun jong ki u la iap ha ka jaka bylla ha jaintia, kum ki briew kiba dang bat ia ka niam tynrai ki la leit phah khan phah peit ha ki nongknia, uwei ba na Tangmang, uwei pat ba na Mawlam bad sa uwei pat u dei na Nong madan, baroh lai ngut mynta kim don shuh, ki la khlad. Kitei ki lain gut ki nongknia ki la rai ba utei u rangbah u la iap, kiba haing hasem kum ki briew kiba bat ia ka knia ka khriam kum kaba kyntang, ki pyndep noh ia ka niam ka rukom, ka khawai iap briew bad kumjuh ruh ia u maw shyieng mawkroh ryngkat ki jingleh niam ia u bah Mit kum uba la iap, hynrei kaba phylla ka long ba katei ka jingbatai ki nong knia ka long pynban da khongpong ha kaba u khun jong ki u dang im.
U Rupang u la ioh ban ia kren bad uwei u nongknia uba sumar mynta ia utei u rangbah ba la wan phai ing hadien 36 snem, ban kylli na u halor katei ka jingbatai ki 3 ngut ki nongknia ba u bah mit u la iap, u bah David Lamin u nongknia ba shong basah ha Nong shyrngan, sha rum Pynursla u la ong, ‘don ki nongknia kiba don ka sap bad ki ba ioh da ka bor blei, don pat ki nongknia kiba shu kamai pisa’.
Utei u nongkhan u la ong ba ki nongkhan kiba la ioh Blei hi kim lalot ia ka pisa hynrei ki shim ba ka kam jong ki ka long ban pyndonkam ia ka sap ba ki la ioh da ki jingshakri ia ki paidbah ba wan ban ud ban nam sha ki, bad ia said na bynta ban beh ia ki jingpang jingshitom ki ksuid ki khrei.
Haba kynthoh halor ki nongkhan ba kamai pisa u bah David u la ong ba ki don bun bha ki nongkhan kamai pisa ha kine ki sngi, kiba pynthame ia u paidbah da ki jingleh nongkhan jong ki , ‘ kim salia tang ban ioh ia ka pisa-khlem da tip bha ruh ki batai shaid shaid’ ong u bah David.
Haba la kylli la ka don jingktah ne-em ban shu khein kam kai ban batai kulmar tang ban ioh pisa u bah David u ong ba katei ka kam ka don jingma bha, ha kaba ia dei ba ki laingut ki nongkhan kiba la batai ba u bah Mit u la iap , u bah David u la ong ba kitei baroh lai ngut ki la iap, hynrei ka don jingma bha ia ki lada ki dang im ioh ka kam ka wan ban kyrtoh kylla hadien.
Ha ka jingiakren bad u Rupang, la sngewthuh ba u bah David Lamin mynshuwa u dei u dkhot ka Sengbah Ki Nongshat Nongkhein, hynrei mynta pat u la ong ba um sngewthuh shuh kata ka jinglong dkhot namarba u bun kam ha ka kam rep kam riang jong u bad ha ki kam sumar briew.